19 апрельыште Йошкар-Оласе Революций площадьыште верланыше «Йошкин пырыс» тоштерыште специальный военный операцийын участникше-влакын йочашт да пелашыштлан сырым ыштыме дене кылдалтше мастер-классым ончыктеныт.
Ты кечын тушко рӱдолана гыч нылле наре тӱрлӧ ийготан ӱдыр-рвезе погынен. Нунылан эн ончычак тоштерым вуйлатыше Лариса Викторовна Лисак марий калыкын кочкышыжо – подкогыльо, команмелна да моло – нерген оҥайын каласкалыш. Тидын деч вара тоштерлан негызым пыштыше Эмиль Витальевич Каримов мӧҥгысӧ сырым радам дене ыштен ончыктыш, тиде кочкыш нерген шуко оҥай дене палдарыш. Чылаже тудым ямдылаш кум шагат кӱлеш, но, мутат уке, ты кечын тоштер пашаеҥ-шамыч уна-влаклан ончылгоч ямдыленыт да тудын дене сийленыт.
Тыгай акцийым Марий Эл Паша да социальный аралтыш министерстве эртарен. Мастер-классыш республик правительстве председательын алмаштышыже Ольга Бадма-Халгаева миен. Тудо палемден:
– «Йошкин пырыс» тоштерыште тыгай мероприятий икымше гана лийын. Мастер-классым эртарыше-влаклан таум ойлена. Ӱшанем, тыгай вашлиймаш-влак ончыкыжымат лийыт, молан манаш гын мемнан республикыште ямдылыме кочкышым йоча-влак палышаш улыт: тамжым веле огыл, кузе ышталтмыжымат. Варажым тудым мӧҥгыштат ямдылен кертыт.
Г.Кожевникова
М.Скобелевын фотожо
