«Единый Россий» партийын депутатше-влакын темлымашышт дене Йошкар-Олаште СВО-н геройжо-влаклан баннерым уэмденыт.
Специальный военный операцийыште вуйым пыштыше-влакым шарнымылан пӧлеклалтше икымше баннерым рӱдолаште Ленин проспект ден Петров урем ушнымаште икмыняр ий ончыч вераҥденыт. Тушто Марий Эл гыч Российын Геройжо Дамир Шаймарданов, тыгак колымекышт Мужество орден дене палемдалтше Игорь Пипякин ден Роман Лебедев ончыкталтыныт. Нуно кумытынат Сомбатхей микрорайонышто иленыт да тунемыныт.
Тыгай баннерым вераҥдаш калык темлен. Жап эртыме семын тудын тӱсшӧ шапалген да герой-влакын ача-авашт уэмдаш йодыныт.
СВО-што вуйым пыштыше боец-влакын лишыл еҥышт дене 12 октябрьыште вашлиймаш эртен. Тушто старший лейтенант Игорь Пипякинын Анна пелашыже лийын. 28-ше №-ан лицейын да тунамсе Марий кугыжаныш политехнический институтын выпускникше Псковысо военно-десантно-штурмовой дивизийыште службым эртен, инженер-сапёр-влакын взводыштын командирже лийын. 2022 ий 19 мартыште разминирований годым ӱмыржӧ кӱрылтын. Марийжын колымыж деч вара Анна контрактым подписатлен да ты дивизийыштак служитлен. Кызыт кок эргыж дене шочмо кундемышкыже пӧртылын.
Елена Лебедева, Роман Лебедевын аваже, вашлиймаште ик историйым каласкален. Такси дене кудалмыж годым водитель баннерым ончен пелештен: «Могай чапле рвезе-шамыч улыт». Ӱдырамаш ойлен: «Нунын кокла гыч иктыже – эргым». Тидым колын, таксист моткочак ӧрын да геройым шарналташ аважым эргыжын шӱгарышкыже наҥгаяш темлен.
СВО-шко Роман шке кумылын каен. 2022 ий 1 майыште колен. Тудо Елена Геннадьевнан улыжат ик эргыже лийын.
Баннерым уэмдымашке Кугыжаныш Погынын депутатше Андрей Виногоров, СВО-н ветеранже-влакын Марий Элысе ассоциацийжын председательже Роман Возняк, Йошкар-Оласе депутат-влак погынымашын депутатше Егор Широков, «Защитники Отечества» фондын филиалжын вуйлатышыже Ренат Магсумов да «Боевое братство» отделенийын вуйлатышыже Владимир Белоусов ушненыт.
– Нине рвезе-влак Шочмо элын чын аралышыже улыт, да калык нуным палышаш, – палемден Егор Широков.
Любовь Камалетдинова
