Юрий Зайцев ден Михаил Васютин Марий Элын кугурак тукымжым Илалше еҥ-влакын тӱнямбал кечышт дене саламленыт.
1 октябрьыште Илалше еҥ-влакын тӱнямбал кечыштлан пӧлеклалтше вашлиймаш-шамыч республикнан кажне гаяк паша коллективыштыже эртеныт. Республик кӱкшытан «Тукым кыл» мероприятий Йошкар-Олаште Яков Эшпай лӱмеш Марий кугыжаныш филармонийыште лийын. Тушко регионнан чыла кундемже гыч поснак мер пашаште чолгалык дене ойыртемалтше илалше еҥ-шамычым пагален ӱжыныт.
Пайремын торжественный ужашыж деч ончыч филармонийын фойештыже республикнан тӱрлӧ кундемже гыч кондымо кидпаша ончер ден гипс фигурым нерынчыме, межым шӱдырымӧ, ротанг гыч корзиҥгам пидме, славян калыкын аралтыш-курчакшым ямдылыме да моло мастер-класс-влак пашам ыштеныт, самодеятельный усталык коллектив-шамыч сылне мурышт да куштымашышт дене кумылым нӧлтеныт. Регионын паша да социальный аралтыш министрже Елена Таникова чыла тидым почётан уна-влаклан: Марий Элым вуйлатыше Юрий Зайцев ден Кугыжаныш Погынын председательже Михаил Васютинлан – кугешнен ончыктен. Мероприятийыште кучемын моло еҥжат лийыныт.
Республикым вуйлатыше Юрий Зайцев кугурак тукымын регионнан да элнан илышыштыже посна верым налмыжым палемден.
«Те Марий Эл ден Российын сай илышышт верч шуко да кыртмен тыршенда. Кужу да тӱҥ шотышто неле илышым эртенда гынат, ончыко эре ӱшанен ончеда. Поро да весела кумылда, илышым аклен да йӧратен моштымыда – чылаланнат сай пример. Те кугезе йӱлам переген араледа, самырык тукымым шочмо кундемым, калыкым да йылмым пагалаш туныктеда, нунылан ик эн ӱшанле эҥертыш улыда. Таче мый поснак, кугу ийготым шотыш налде, мер пашаште чолган тыршыше, лӱмын эртарыме сарзе операцийыште кредалше землякна-шамычлан гуманитар грузым погаш полшышо, волонтёр сомылым шуктышо, шке опыт дене йоча-влак ден молодёжьым палдарыше еҥ-влаклан тауштем. Ме тендам чыладамат моткоч пагалена да кугурак тукымын илышыжым саемдыме пашам ик эн ончыч шукташ тыршена», – палемден тудо.
Ийгот тӱҥ огыл, самырык чон да тӱням куанен ончымо кумыл шергакан, ешарен регионым вуйлатыше да икмыняр еҥлан кугыжаныш награде-влакым кучыктен.
«Россий Федерацийын калыкым социально аралымашыжын сулло пашаеҥже» чап лӱмым Юрино районысо калыкым социально обслуживатлыме комплексный рӱдерын директоржо Галина Зайцевалан пуымо, Марий Элым вуйлатышын Таусерышыжым – «ший» ийготан чолга волонтёр-шамыч Надежда Кусочковалан (Юрино район), Светлана Поляниналан (У Торъял район) да Нина Селезнёвалан (Йошкар-Ола).
Кугыжаныш Погынын председательже Михаил Васютин пайремын Россий калык-влакын икоян улмо идалыкыште эртымыжым ушештарен да республикыштына 50 утла калыкын келшен илымыжым палемден.
«Тиде икойлыкышто – мемнан тӱҥ куатна. Кугурак тукым икте-весе дене келшыме, икте-весылан полшымо да икте-весым пагалыме акым эн сайын умыла. Тудо – пошкудо-влак дене келшен илыме йӱлам аралыше тукым. Меат тидым перегышаш да вияҥдышаш улына», – манын марий парламентын спикерже.
Михаил Васютин кугурак тукымлан шочмо республикым вияҥдымаште да экономикым пеҥгыдемдымаште шкем чаманыде тыршымыжлан, йоча ден уныка-влакым куштымыжлан, самырык-шамычым илышлан туныктымыжлан, кызыт лӱмын эртарыме сарзе операцийыште кредалше пӧръеҥна-влаклан лым лийде гаяк полшымыжлан тауштен, кажныжлан пеҥгыде тазалыкым, кӧргӧ куатым, тыныс илышым тыланен да икмыняр еҥлан Кугыжаныш Погынын наградыжым кучыктен.
Чолга граждан позицийым ончыктымылан да мер пашашке шке надырым пыштымылан марий парламентын Таусерышыж дене «ший» ийготан волонтёр-влак Надежда Булатова (Волжский округ), Лариса Васильева (Советский район), Любовь Падерова (Килемар округ), Борис ден Тамара Петровмытын ешышт (Курыкмарий район) палемдалтыныт.
Торжественный церемонийыште тыгак Марий Эл правительстве председательын икымше алмаштышыже – регионым вуйлатышын администрацийжым вуйлатыше Лидия Батюкова ден паша да социальный аралтыш министр Елена Таникова илалше еҥ-шамычлан таумутым ойленыт, икмыняржым ведомство-влакын наградышт дене палемденыт.
Пайремым Яков Эшпай лӱмеш Марий кугыжаныш филармонийын да республикнан муниципальный образованийлаж гыч толшо артист-шамыч сӧрастареныт.
***
1 октябрьыште «Марий Эл» увер агентстве шке ветеранже-шамычым «Онар» рестораныш пагален ӱжын.
«Агентствым вуйлатыше Евгений Иванович Кузнецов мыланна шуко поро мут ден тыланымашым ойлыш. Моткоч тутло сийым теммеш кочна, чоным кандарымеш мутланышна. Тиде вашлиймаш ушешем кужу жаплан кодеш», – «Марий Эл» газет редакцийнан ветеранже, Марий Элын сулло журналистше Галина Якаева пайрем деч вара куанен палемдыш.
***
Таче Марий Элыште илалше ийготан 156 тӱжем утла еҥ шотлалтеш, нунын кокла гыч 123 тӱжем нарыже 65 ияш деч кугурак ийготан улыт. Регионысо калык кокла шот дене 71,9 ий ила. Кундемыштына 100 ийым темыше 60 еҥ уло, кум ӱдырамаш – 104 ияш.
***
Республикыштына илалше еҥ-влакым социально обслуживатлыме 57 кугыжаныш тӧнеж пашам ышта, тыгак «Социальный такси» программе, куснылшо бригаде, компьютер грамотлан туныктымо курс, интерес шотышто клуб-шамыч, «Кумшо ийготын университетше» улыт. 2025 ийыште 8 тӱжем утла илалше еҥ социальный полыш дене мӧҥгыштыжак пайдаланен, куснылшо бригаде-влак тора илемлашке 4,6 тӱжем гана лектыныт.
Маргарита ИВАНОВА.
Марий Элым вуйлатышын пресс-службыжын фотожо.
