РФ Просвещений министерстве школышто тунемше, туныктышо да ача-ава-влаклан психологий полышым пуышо «Школа доверия» линийым пашаш колтен.
Тудын номерже – 8-800-707-02-01 – дене суткан кеч-могай жапыштыже йыҥгырташ лиеш.
Тӱҥ шонымаш – школышто нелылыкыш логалше (мутлан, иктаҥаш але кугыеҥ-шамыч дене умылыдымаш уло, классыште мыскылат але огыт мутлане, тунемаш кумыл уке, палыдыме-влак оксам кусараш але эше иктаж-мом ышташ йодыт да молат) тунемше-шамычлан полшаш.
Тыгай линийым Москвасе кугыжаныш психолого-педагогический университетын Россий Федерацийысе образований системыште психолого-педагогический полышым вияҥдыме шотышто федеральный координационный рӱдерыштыже ыштыме. Йыҥгыртыше-влаклан полышым квалификациян специалист-шамыч пуат.
Линийым почмеке, тушко йыҥгыртыше ӱдыр (иктаҥашыже-влак дене умылыдымашыш лектын) дене просвещений министр Сергей Кравцов шкак мутланен, тӱткын колыштын.
Тунемше-влаклан йыҥгырташ веле огыл, тыгак университетын сайтышкыже возен колташ лиеш.
Г.Кожевникова
Фотом Марий Эл Образований да науко министерствын соцкылысе лаштыкше гыч налме.
