Йошкар-Оласе 14-ше гимназийыште республикысе школ директор-влакын черетан заседанийышт лийын.
«Молодёжь да йоча-влак» национальный проект почеш тений тиде тунемме верым капитально олмыктеныт. Школ директор Вячеслав Цепелёв погынышо-влаклан уэмдыме зданий мучко экскурсийым эртарен, у тунемме кумдыкла дене палдарен.
Заседанийыште вуйлатыше-влак школ директорын пашажым ышташ тӱҥалше-шамычын «Компас роста – вектор развития директор» форумлан (тудо 25-26 сентябрьыште «Лесная сказка» эмлалтме да тазалыкым пеҥгыдемдыме комплексыште лиеш) ямдылалтме шотышто каҥашеныт. Тыгак нуно школышто профориентаций пашам эртарыме нерген мутланеныт. Погынымаште палемденыт: тудым кажне школын спецификыжым шотыш налын ворандарыман. Паша опыт дене Козьмодемьянск оласе лицейым вуйлатыше, «Россия – мои горизонты» форумын участникше Светлана Громова палдарен. Марий образований институтын ректоржо Лариса Овчинникова цифран тунемме контентын универсальный книгагудыжо дене кылдалтше проектым илышыш пуртымо шотышто темлымаш-влакым ыштен.
Вуйлатыше-шамыч тыгак регион мучко сай паша лектышан школ-влак мучко турым эртарыме шотышто каҥашеныт.
Тыгай вашлиймаш республикысе школ директор-влак кокласе профессионал вашкылым ышташ да вияҥдаш полша.
Г.Кожевникова
Фотом Марий Эл Образований да науко министерствын соцкылысе лаштыкше гыч налме.
