Марий Элыш Российысе Федеральный Грузин калыкле-тӱвыра автономийын президентше Давид Цецхладзе толын коштын.
Давид Цецхладзе эше Россий президент пеленысе Калык-влак кокласе кыл шотышто советын йыжыҥъеҥжылан шотлалтеш, Россий калык-шамычын пӧртышт» ФГБУ пеленысе общероссийский калыкле-тӱвыра мер объединенийын пашаче группыжым вуйлата. Мемнан деке республикнан калык-шамыч кокласе кылым вияҥдыме практикыже, Россий калык-влак ассамблейын да регинысо калыкле-тӱвыра объединенийын пашашт дене палыме лияш толын.
Эн ончычак Йошкар-Олам ончен савырнен, 32-шо №-ан школышто тунемме заведенийын директоржо, Кугыжаныш Погынын депутатше Наталья Пушкина дене вашлийын мутланен. Вара «Герои Отечества» тоштер-патриот рӱдерыште Россий калык-влак ассамблейын регионысо пӧлкажын йыжыҥъеҥже-шамыч дене вашлийын. Тыште нуно калык тӱвыра ден йӱлам арален кодымо, калык-влак кокласе келшымашым пеҥгыдемдыме да умбакыже вияҥдыме йодышлам лончыленыт. Мероприятийыште республикын элгӧргӧ политике министрже Антон Мирбадалев участвоватлен.
Вашлиймаште Наталья Пушкина участник-влакым Еш, йӧратымаш да икте-весылан ӱшанле улмо кече дене саламлен да палемден: шуко калыкан обществын илыш негызыштыже лачшымак еш, ваш пагалымаш да икойлык кият.
Давид Цецхладзе республикыштына шокшын вашлиймылан тауштен да Марий Элыште калык-влак кокласе келшымашым пеҥгыдемдыме пашалан кугу акым пуэн. Тыгай шотан вашлиймаш икте-весым опыт дене палдараш, вашкылым вияҥдаш да пырля ямдылыме проект-влакым илышыш пурташ йӧным ышта, палемден пагалыме уна да посна тӱткышым Россий президент Владимир Путинын увертарыме Россий калык-влакын икоян улмо идалыклан ойырен.
«Тиде, кажне калыкын йӱлажым, йылмыжым да тӱвыражым пагален, элнан икойлыкшым арален кодаш кӱлмӧ нерген эше ик гана сайын шоналташ кугу амал», – манын Давид Цецхладзе.
Вашлиймаште регионыштына этнокультур диалогым умбакыжат вияҥдымашке виктаралтше пунчал-влакым приниматлыме. Участник-шамыч Марий Элыште Грузин-влакын калыкле-тӱвыра автономийыштым почаш да Россий калык-шамыч пӧртын пашаче группыж дене пашам пырля ышташ мутланен келшеныт.
Маргарита ИВАНОВА.
Марий Эл Кугыжаныш Погынын пресс-службыжын фотожо.
