6 июньышто Москваште Руш йылмын кечыже эрта. Тудын ик эн тӱҥ мероприятийже – «Шочмо элет нерген тӱнялан каласкале» тӱнямбал конкурсышто сеҥыше-влакым саламлымаш. Сеҥыше-влак коклаште – Марий Эл Медведево посёлко гыч Виктория Васильева.
Ты кечын Российын рӱдолашкыже 89 регион гыч , тӱнямбалсе 65 эл гыч талантан ӱдыр-рвезе-влак чумыргат. Конкурсышто сеҥыше-влакым саламлаш арам огыл Руш йылме кечым ойырымо: шочмо йылме да патриотизм – ик тичмаш гай. Лач шочмо йылмышт гоч участник-влак шке кундемыштым йӧратымыштым почын пуат. А тӱнямбал конкурс Россий нерген чылаштлан умылаш лийше йылме дене каласкалыше кугу площадкыш савырна.
Тений «Шочмо элет нерген тӱнялан каласкале» конкурсыш ушнаш 20 тӱжем утла йодмаш пурен, финалыш 8 тӱжем наре усталык паша лектын, а сеҥыше семын Российын 22 регионжо да 20 йотэл гыч 62 автор палемдалтын. Нунын коклаште – Марий Эл гыч Медведево районысо йоча усталык пӧртын «Объектив» фотостудийышкыже коштшо Виктория Васильева. Тудо «Презентаций» номинацийыште сеҥышыш лектын.
Усталык пӧртын талантан туныктышыжо Лилия Сазонован вуйлатымыж почеш Виктория конкурсыш Россий Федерацийын сулло да Марий Эл Республикын Калык художникше Иван Ямбердовлан да тудын усталыкшылан пӧлеклалтше презентацийым ямдылен.
«Тӱрлӧ регионла гыч паша-влакым ончен, мемнан кундемнан кумдан палыме сӱретчыже нерген каласкалаш кумыл лектын. Мыланем тудын радынаже-влак келшат, нуным марий калыкын поянлыкшылан шотлем. Конкурслан проектым ыштыме паша кужу лийын, но моткоч оҥай. Сӱретче нерген шукырак да шукырак палымем шуын. Тыге шуко у шинчымашым налынам, Иван Ямбердовын сӱретлыме стильже шотыштат», – ойла Виктория.
Сеҥыше-влакым «Россий» национальный рӱдерын сценыштыже кумдан палыме россий кугыжаныш да мер деятель, молодёжь организацийлам вуйлатыше, ончыл вузласе профессор, элнан дипломатический корпусшын еҥже-влак да молат саламлат.
Пайремле мероприятийым концерт программе сӧрастараш тӱҥалеш. Ӱдыр-рвезе-влакын кумылыштым чапланыше артист, эстраде коллектив-влак, мутлан, «Домисолька», «Непоседы» кумылыштым нӧлтат.
Саламлымаш деч вара уна-влак «Россий» национальный рӱдерын экспозицийже, «Россий мучко путешествий» интерактивный программе дене палдарат.
Конкурсым Россий Федераций президентын администрацийже, Россий Йотэл паша министерстве, Россий Федераций Просвещений министерстве, Федераций Совет, Кугыжаныш Дума, «Россий» национальный рӱдер, Россотрудничестве, «Руш тӱня» фонд, «Знание» Россий обществе, Роспатриотцентр, российысе Калык-влакын пӧртышт, Российысе калык-влакын ассамблейышт, МПГУ, ТАСС полшымышт дене Йоча да молодёжьым вияҥдыме да воспитанийым пуымо инноваций рӱдер эртара. Партнёр-влак специальный номинаций-влакым (мутлан, «Келшымаш кӱвар: Россий тӱвыра-влак кокласе вашмутланымаште», «Российын ончыкылыкшо регион-влакым вияҥдымаште» да молат) ыштеныт.
Саламлымаш «Россий» национальный рӱдерын сайыштыже онлайн йӧн дене ончыкталтеш.
***
Палемдыман, 4-6 июньышто Петербургысо тӱнямбал экономике форумышто «Шочмо элет нерген тӱнялан каласкале» тӱнямбал проект нерген мутланымаш молодёжь да кросс-тӱвыра поветсткыште ик эн тӱҥ лиеш. Ты проектым илышыш пуртымо ончыктен: Российысе да йот элласе молодёжь коклаште икмыняр ийыште гына мемнан элна деке пагалымашым шочыктен.
Г.Кожевникова
Фотом соцкылысе лаштык гыч налме.
