Россий кӱкшытан «Машук» тунемме рӱдерыште советник ден ача-ава-влакын форумыштышт – Марий Эл гыч участник-шамыч.
Тиде Звенигово район да Йошкар-Ола гыч координатор-влак Светлана Клешнина ден Мария Мальцева.
«Йоча жапын навигаторжо ден ача-ава-влакын сообществышт: ончыкылыклан вашкыл» тунемме мероприятий элна гыч 200 наре участникым иквереш чумырен. Нине участник-влак – общеобразовательный да профессионал образованийым пуышо организацийым вуйлатыше-влакын воспитаний паша шотышто советник-шамыч, ача-ава сообществе-шамычын регионысо чолга еҥышт, Россий Просвещений министерстве пеленысе ача-ава-влакын всероссийский комитетын представительышт.
Нунылан Росдетцентрын специалистше, самырык тукым дене паша ыштымаште эксперт-влак лекций ден занятийлам эртарат. Тыгак пашалан кумылаҥдыше вашлиймаш-шамыч, проект сессий да молат лийыт. Ӱчашымаш площадкыдаште участник-влаклан шонымашым каласаш, темлымашым ойлаш йӧн ышталтын.
– «Машук» рӱдерыште лияш шукертак шоненам. Тиде тӱрлӧ шонымашым шочыктышо, шӱмым вургыжтарыше да ик эн оҥай проектлам илышыш пуртышо вер. Рӱдерыш логалаш манын, эн сай практик-влакын конкурс отборыштым эртенам. Тыште чапле инфраструктур, у пашалан кумылаҥдыше еҥ-влак да вияҥаш таратыше кумдык. Кажне кечын ме у шинчымашым налына, у еҥ-влак дене палыме лийына, – ойла Мария Мальцева.
Светлана Клешнина ешарен:
– Ача-ава-влак тӱням йочаштын шинчашт дене ончат, а школ директорын воспитаний паша шотышто советникше – образований системе могырым. Но лач тӱрлӧ велым пырля ончымаш вашкылым пеҥгыдемда.
Г.Кожевникова
Фотом Марий Эл Образований да науко министерствын соцкылысе лаштыкше гыч налме
