Эртыше кечылаште Самара областьыште Юл кундем федерал округын «iВолга-2023» молодёжь форумжо эртен. Тудо Российын регионлаже, тыгак Луганск да Донецк калык республикла гыч кок тӱжем утла ик эн чолга ӱдыр-рвезым иквереш чумырен. Нунын кокла 90 наре самырык еҥже Марий Эл гыч лийын.
Кажне ийын эртаралтше ик эн кугулан шотлалтше форумыш йодмаш поснак шуко пурен: ик верыш – латкуд еҥ. «Ий гыч ийыш шке регионжо вияҥме верч тыршыше ӱдыр-рвезе шукем толеш. Тиде цифр теве мо нерген ойла», – палемден форумыш погынышо-влаклан сай паша лектышым тыланымыже годым Юл кундем федерал округышто Россий Федераций президентын полномочный представительже Игорь Комаровын лӱмжӧ дене тудын алмаштышыже Олег Машковцев.
Участник-влаклан ты гана 8 профилян сменыште шинчымашым келгемдаш, моштымашым ончыкташ йӧн лийын. Каласыман, нуныжым регион-влак шкак ямдыленыт. Мутлан, Пенза ден Оренбург областьласе самырык-влак «Тукым-шамычын икоян улмышт» сменым конденыт, Мордовий «Шанче проспектышкыже» ӱжын, Татарстанын «Молодёжын флагманже-влак» маналтын. Мемнан Марий Эл Чуваший да Самара область дене пырля «Порылык миссий» сменым эртарен.
Форумын площадкыштыже шанче технический усталык выставке пашам ыштен. Тидын деч посна ӱдыр-рвезе-влаклан тӱрлӧ направлениян тренинг, молодёжь проект конкурс, шанче да практике конференций, мастер-класс, регион да вуз-влак кокласе таҥасымаш, сай тӱҥалтыш-шамычын ярмиҥгашт, тыгак федерал, округ да регион кӱкшытан эксперт-влак дене вашлиймаш-шамыч лийыныт.
Марий Эл гыч участник-влакым кумылаҥдаш форумыш республик правительстве председательын икымше алмаштышыже Евгений Кузьмин, тыгак алмаштышыже Ольга Бадма-Халгаева миеныт. Ӱдыр-рвезе-влак нунылан шке проектышт дене палдареныт, шонымашыштым ойленыт.
А тыгайже нунын чынжымак шагал огыл да форумысо лектышат куандарыше. Эн ончычак мемнан-влак «Врачын полышыж деч ончычсо икымше полыш» этапыште икымше верым сеҥен налыныт.
«Спорт кумдык» сменыште эртыше таҥасымаште противогазым чийыме шотышто эн кугу писылыкым Марий Эл гыч Данила Коротков ончыктен, а лӱйкалымаш дене икымше верыш Аня Маравина лектын.
«Калык йомакче» конкурсышто республикна гыч команде 3-шо вер дене палемдалтын. Самырык модельер-влакын конкурсыштышт Марий Элын чапшым Йошкар-Оласе технологический колледжын Модо театрже арален. Тудо «Онарын ӱдыржӧ-влак» коллекцийжым ончыктен.
Форумын пытартыш кечынже Юл кундем федерал округысо Молодёжь парламент-влак ассоциацийын черетдыме заседанийже лийын. Икымше гана тудо «галстук деч посна» формат дене эртен. Элын 150 парламентарийже коклаште Марий Элын Молодёжь парламентшын председательже Мария Дорогова Россий Федерацийысе граждан-влакын персональный данныйыштын единый реестржым ыштыме шотышто тӱҥалтыш дене палдарен. Тыгак тудо специальный военный операций эртыме кундемлаш боец семын кайыше предприниматель-влаклан электрон цифран кидпалын срокшым кужемдыме шотышто темлымашым ыштен. Тидым кугурак коллеге-влак ик эн сай тӱҥалтыш семын палемденыт.
Форумышто палдарыме эн сай проект-шамычым Молодёжь паша шотышто федерал агенстве ден Юл кундем федерал округышто граждан обществым вияҥдаш полышым пуышо фонд 500 тӱжем теҥге кугытан грант дене палемдат.
Г.Кожевникова
Фотом интернет гыч налме.
