Коронавирус эпидемийлан кӧра латикымше Марий калык погыным 1-3 октябрьыш кусарыме нерген возенна ыле. Ты пагытыштак, лачшымак 1октябрьыште, Йошкар-Олаште «Пеледыш пайрем» всероссийский фольклор фестивалым эртараш палемдыме. Тудын положенийже дене республикысе Марий тӱвыра рӱдерын сайтыштыже палыме лияш йӧн уло.
Марий Элын тӱвыра, савыктыш да калык паша шотышто министр Константин Ивановын палемдымыж почеш, шыжым ты Ага пашам мучашлыме йула пайремым эртараш келшен ок тол гынат, тидым ыштыде огына керт. Вет тений республикна семынак Пеледыш пайремым эртараш тӱҥалмылан 100 ий темын. Марий калыкнан тӱшкан илыме верлаж гыч погыныш толшо представительже-влакат меман дене пырля ты датым палемден кертыт.
Утларак еҥ ушнен кертше манын, тений организатор-влак тудым очный да заочный формо дене эртараш ямдылалтыт. Молгунамсе семынак тушко марий калыкын тӱвыраже, йӱлаже, мастарлыкше дене палдарыше творческий коллектив, музыкант, сылнымутчо, кидмастар ушнен кертыт. Мероприятийын программыже кумылым нӧлтышӧ лийшаш.
Теният «Кудо» конкурс ончылгоч увертаралтеш. Тудым эн сайын тӱзатыме, тушто марий шӱлыш озаланымым, марий кочкыш дене унам вашлийын сийлымым, шке дене палдарымым жюри аклаш тӱҥалеш. Видеон кужытшо 10 минут деч утла лийшаш огыл.
«Шокталте гармонетым» конкурсышкат ушнаш лиеш. Шкет шоктышо, фольклор коллектив-ылакын видеошт 10 минут деч утла лийшаш огыл. Участник-влакым ийгот шот дене ойырен палемдаш тӱҥалыт.
«Эх, марий вате» конкурсыш ушнышо ӱдырамаш-влак 3 минуташ презентацийым колтышаш улыт (марий вургем, марий кочкыш презентаций, творческий номер лийшаш).
«Мастар кид» конкурсыш арверым, сувенирым шке кид дене ыштыше мастар-влак ушнен кертыт.
Пйарем жапыште «Сылнымут унагудо» да«Калык чон» онлайн-концерт эрташ тӱҥалыт. Тушкат ончылгоч шке почеламут ден выступлений-влакым колташ лиеш.
«Пеледыш пайрем» фольклор фестивальыш ушнаш шонышо-влак 22 сентябрь марте Марий тӱвыра рӱдерын mari-centr_konkurs@mail.ru электрон почтышкыжо йодмашым але видеом колтышаш улыт. Тӱрло йодмашын формышт тыгак рӱдерын сайтышкыже вераҥдалтыныт.
С.НОСОВА
