Марий Элыште 3 гыч 7 ияш марте йоча-влаклан палемдалтше выплатлан 10 тӱжем утла йодмашым пуымо.
2 июньышто Марий Элым вуйлатыше Александр Евстифеев Россий Федераций правительстве председательын алмаштышыже Татьяна Голикован видеоконференций йӧн дене эртарыме селектор совещанийыштыже участвоватлен. Тушто 3 гыч 7 ияш марте йоча-влаклан палемдалтше тылзе еда тӱлыман выплатым организоватлыме йодышым лончыленыт.
Еш-влаклан полшымо у мере илышыш РФ президент Владимир Путинын порученийже почеш пурталтын. Тудо ешысе кажне еҥлан шотлымаште 9830 теҥге погыныдымо годым палемдалтеш.
Ешыште 3 гыч 7 ияш марте йоча икмыняре гын, окса кажныжлан ойыралтеш. Тыгодым тылеч ончыч палемдыме регионысо чыла выплате тичмашнек аралалтын кодеш.
Выплатын суммыжо – регионышто илен лекташ кӱлмӧ кугыт гыч 50 процент але 5033 теҥге. Тудым тений 1 июнь гыч тӱлаш тӱҥалыт да 2020 ий 1 январь гычак палемдат. Икманаш, икшывылан 2020 ий 1 январь марте 3 ий темын гын, 1 июнь марте йодмашым пуышо еш выплатым идалыкын икымше вич тылзыжлан налеш. А йочалан 2020 ий январь-июньышто 8 ий темын гын, выплате 1 январь гыч шочмо кечыж марте палемдалтеш.
Таче кечылан республикыштына калыкым социально аралыме органлан учётыштышт тӱнен илыше семын 19 тӱжем ешым регистрироватлыме, тушто 3 гыч 7 ияш марте 24 тӱжем йоча ила.
Выплатлан йодмашым кугыжаныш услуго порталыште электрон йӧн дене пуымат сита. Кодшо моло документым, ты шотыштак ешын доходшо нерген уверым, ведомство-влак коклсе кыл полшымо дене налыт. Кугыжаныш услуго порталыште личный кабинет уке гын, йодмашым шуко функциян але калыклан социально полшымо мерым пуымо верысе рӱдерлаште пуаш лиеш.
2020 ий 2 июньлан Марий Элысе кугыжаныш услуго единый портал гоч 10740 тыгай йодмашым пуымо.
Марий Элым вуйлатышын организаций да аналитике виктемжын уверже негызеш М.ИВАНОВА ямдылен
