МАРИЙ ЙӰЛА ТАЧЕ ЯЛЫШТЕ

Марий У ийым вашлийыныт

21 мартыште Звенигово районысо Красногорский библиотекыште «Листая страницы Марийского края» проектым илышыш пуртымо кышкарыште марий У ийым вашлийыныт.

Теме дене кылдалтше материалын шагалрак улмыжлан кӧра мероприятийым ямдылыме годым книгагудо пашаеҥ-влаклан ситышынак «пӱжалташышт» логалын, но нуно чылажымат жапыштыже да тичмашын чумырен шуктеныт. У коронавирус инфекцийын шарлен кертмыж деч регионыштына утларак ямде улмо режимым увертарымылан кӧра марий У ийым вашлияш 11 еҥ гына толын.  

Звенигово межпоселенческий библиотекын краеведений секторжым вуйлатыше Надежда Ивановна Бочкова калыкым марий календарьын 32 «озаж» дене палдарен, поснак 2020 ий, Слон идалык, нерген кумдан каласкален.

Тиде вашлиймаш библиотекыш толшо-влакым шуко у увер, йӱла дене кылдалтше книга дене палдарен. Тылеч посна кажныже илышыж гыч У ий дене кылдалтше оҥай историйым каласкален. Мероприятий марий йылме дене эртымыж дене шергакан.

М.ИВАНОВА

Опубликовать в Одноклассники

Добавить комментарий