Курыкмарий районысо Кожваж селаште хоккей дене Марий Эл вуйлатышын кубокшо верч таҥасымаш икымше гана эртен. Турнирыште ял шотан илемла гыч команде-влак вийыштым тергеныт. Ты кундемыште хоккей площадкыжат идалык ончыч гына ышталтын улмаш. Тудым чоҥаш верысе, тыгак воктенысе чолга еҥ-шамыч ушненыт. Шкеак кӱлеш материалым налыныт.
Кодшо ий сентябрьыште тушко регион вуйлатыше А.Евстифеев миен. Чылажат сай да йӧнан лийже манын, вургемым вашталташ шокшо пӧлем гына ситен огыл, но… Тений тудымат ыштеныт. Ончычсо школын мастерскойжым келыштареныт: батарейым чӱктеныт, электротулым шупшыныт.
Ты турнирыште кугурак ийготан-влак коклаште Микрік села гыч хоккеист-шамыч эн тале лийыныт. Кокымшо верым Кулаковы села гыч команде налын гын, кумшым – Усолаште илыше-влак.
Юниор-шамыч коклаште оза-шамыч ончыко лектыныт.
Е.ЭШКИНИНА
