СПОРТ

Нунын канышышт уке

Теле каникул жапыште Волжский районысо Пӧтъял кыдалаш школышто физкультурым туныктышо А.Семёнов ден ДЮСШ-ын тренерже С.Иванов шкешотан сборым эртареныт.

Тушко йоча-влак уло кумылын коштыныт: волейбол, баскетбол, теннис дене модыныт, ГТО-м сдатлаш ямдылалтыныт. Молгунамсе семынак эртышаш всероссийский президент модмашланат ончылгочак тренировкым  тӱҥалыныт. Ӱдыр-рвезе-шамычым яра шокшо кочкыш дене сийленыт.

«Спорт да физкультур дене таҥлалтат – кумылет  нӧлтеш, капкылет лывырга, пайдалын канет», – пеҥгыдемденыт йоча-влак.

Тушко коштшо-шамыч вий-куатым налыныт, весела кумыл дене пойдаралтыныт.

– Каныме жапыште спортивный сборым эртараш ончыкшым йӱлаш пуртена. Шошо каникулланат кумылан-влакым чумыраш шонена. Тек ӱдыр-рвезе-влакын канышышт пайдале лиеш, шукырак яндар южыш лектыт. Ты гана сборышто 55 йоча лийын. Нуно тӱрлӧ стартыш лектыт. Тений поснак Юлия Тимофеева, Аня Осипова, Антон Тимофеев, Максим Уткин, Никита Алексеев, Максим Степанов ойыртемалтыныт. Шыжым спорт дене кылдалтше олимпиадыштат икмынярышт призёр радамыш логалыныт, а Антон икымше верыш лектын, – ойла физкультурым туныктышо Альберт Аркадьевич.   

Е.ЭШКИНИНА

Опубликовать в Одноклассники

Добавить комментарий