Морко районысо Шлань ял Унчо кундемын йӱдвел-эрвелныже верланен. Тораштак огыл Шора эҥер йога. Йӱдвелныла чодыра гӱжлен шога. Ялыште марий ден татар-влак ваш умылен, икте-весылан полшен, мутым вашталтен веселан илат. Кажне ийын тиде ялыште у суртым чоҥат, вольыкым ончат. Самырыкше Йӱдвелкыла, Москваш, Казаньыш пашаш коштыт, а весышт- «Передовик» колхозышто тыршат.
Тыште кечыжат эррак лектеш. Сандене Шлань ял калык пашаланат кожмак, каненат мошта.
Пургыж тылзын кокымшо кечынже Шлань клубышто Марий кас эртен. Ял калык кас сомылым тӧрлымеке, марий вургемым чиен, вашлиймашке вашкен. Пайрем касым Алексей Григорьев ден Лариса Григорьева вӱденыт, клуб вуйлатыше Дмитрий Терентьев сем аланым сӧрастарен. Нуно верысе калыкым веле огыл, пошкудо ялла гыч толшо-влакымат мелна кышыл, муро дене вашлийыныт.
Каныш касыш Шӱргӧ, Шап Унчо ялла гыч уна-влак, Унчо села гыч «Унчо ӱжара» ансамбль толыныт. А Шлань ялын «Эркечыже» пайремым сылне деч сылне муро, куштымаш дене сӧрастарен. Залыште иктат шып шинчен огыл: чылан куштеныт, муреныт, сем почеш лывыла пӧрдыныт.
Шлань ялыште илыше-влак пайремыш толшо-шамычым могай гына кочкыш дене сийлен огытыл?! Коҥга гыч лукмо шокшо палыш, когыльо, мелна, шыл, тӱрлӧ салат…
Клубыш чылан марий вургемым чиен толыныт. Ныжыл марий муро, сем почеш тӱрлӧ модмаште, конкурсышто чолгалыкым ончыктеныт.
Марий кас чылалан келшен, эрласе кечылан илыш шулдырым ешарен, куан тулым ылыжтен. тудым Унчо кундемыште тӱрлӧ ялыште черет дене эртараш кутырен келшеныт. «Унчо – финн-угор тӱнян культур рӱдыверже» лӱмым шотыш налын, шошым тыгак Шӱргыштӧ, кеҥежым Шап Унчышто, шыжым Ямбатырыште, а мучашлан Унчышто эртышаш.
Л.Григорьева
Шӱргӧ ял.
