8-10 ноябрьыште Волжский районысо Приволжский кыдалаш школын спортзалыштыже бокс дене СССР-ын спорт мастерже, Марий Элын заслуженный тренерже Гумар Мухамедзяновым шарныме лӱмеш IX турнир эртен. Таҥасымашке куд регион гыч 198 тунемше чумырген.
Приволжский кыдалаш школын спортзалже гыч йӱк-йӱан коридор мучко йоҥген. Ончышо-влакат ятырак улыт ыле. Ача-ава деч посна тӱҥ шотышто тунемше-влак лийыныт. Рингшат чапле. Икмыняр ий ончыч тудым Физический культур, спорт да туризм министерстве ойырен.
Теве ик мужыр почеш весе рингыш лектыт, мастарлыкыштым ончыктат. Южышт писе, тале, южышт техничный улмышт денат ойыртемалтыт.
– Мыланем бокс келша, – веле манын шуктыш 6-шо классыште тунемше Н.Пушков, рингыш куржо. Соперникше Татарстан гыч тале рвезе. Коктынат тыршышт, шукыштым тургыжланаш таратышт. Никита ӱшанлын ончыко лекте.
– Кундемыштына бокс вияҥеш. Тренер Александр Степановым мокталтыман. Никита эргымым уремыште арам перныл ынже кошт манын, ты секцийыш пуэнам. Тыште чыла велымат шуаралтыт. Залыште упражненийым ыштат, тренажерышто ямдылалтыт гын, кеҥежым уремыште куржталыт, физически пеҥгыдемыт. Результатшат уло: ик гана веле огыл икымше верым налын, – палемдыш шке тўшкаштыже икымше верым налше Никитан ачаже В.Пушков.
– Ӱдыр-влакат ушнат. Мыят куд ий бокс дене пеҥгыде кылым кученам. Сеҥымашемат лийын, – ойла Агнесса Степанова. – Бокс торжа вид гынат, пеш келша. Тудо койыш-шоктышым пеҥгыдемда, шкем аралаш туныкта, шкан ӱшаным шочыкта. Мутлан, тыглай шыма ӱдыр уремыште кая, а иктат ок пале тудын пеҥгыдылыкшым. Оҥайыс.
– Турнир сай кӱкшытыштӧ эртыш. Участник-шамычат тале улыт ыле. Тыште лач тунемше-влак гына вийыштым тергат. Шке тӱшкаштышт сеҥыше-влакым саламлыме деч посна эн техничный боксёрым палемденна. Тиде – Никита Пушков лийын, – мане турнирын организаторжо А.Степанов.
Шижалте: тренер-влак шке воспитанникышт верч тургыжланат, ой-каҥашышт дене полшат. Рингыште улмышт годым кузе шкем кучымо шотышто кычкыралыт. Теве тыге тунемше-влак опытым погат, мастарлыкым шуарат, тале спортсмен лияш ямдылалтыт.
Е.Эшкинина.
Авторын фотожо.
