Шорык
Арня тӱҥалтыш куштылгыжак огеш лий. Поснак – ача-ава-влаклан. Молан манаш гын, икшывыда тургыжланаш амалым луктеш. Йӧратыше самырык мужыр-влак коклаште умылыдымаш лектын кертеш. Арнян кокымшо пелыштыже вашкылда тӧрлана.
Презе
Тенданат арня тӱҥалтыште ешыштыда да йӧратыме еҥда дене вашкылыште нелылык вашлиялтеш. Тидыже шӱмбелда да родо-тукымда дене кылдалтеш, очыни. Ты амаллан кӧрак арнян икымше пелыштыже нигӧмат унала ӱжаш огеш темлалт.
Йыгыр
Тыланда кугу тӱткышым тазалыклан ойырыман. Уке гын кылмен черланен кертыда. А тидлан кӧра палемдыме пашада ышталтде кодын кертме лӱдыкшӧ уло. Нине кечылаште у еҥ-влак дене палыме лияш, родо-влак дене вурседылаш огеш темлалт. Йолташда-влакын ой-каҥашыштым шотыш налза.
Рак
Шӱдыр-влак оксам аныклен кучылташ кӱлмӧ нерген шижтарат. Тиде арнян шергакан пӧлекым монь налаш огеш темлалт. Уке гын нелылыкыш логал кертыда. Йӧратыме еҥда дечат сюрпризым ида вучо. Каныш кечылаште сӱретым сай велыш вашталтен кертыда.
Лев
Арня тӱҥалтыште те иктынат шонымашыжым шотышко огыда нал. Чылажымат шкендан семын ышташ тыршеда. Иктаж-кӧ тидын дене келшыдымыж нерген каласа гын, чот сыреда. Каныш кечыла вашеш иктаж-кушко миен толаш йӧн лектеш.
Ӱдыр
У еҥ-влак дене палыме лияш огеш темлалт. Поснак – ӱдырамаш-влаклан, вет тиде нимо сайымат огеш сӧрӧ. Шагал палыме еҥ-шамыч дене шке илышым каҥашаш вашкыман огыл. Йӧратыме еҥда дене кыл куандарыше лиеш. Тудо тыланда кугу тӱткышым ойыраш тӱҥалеш.
Виса
Арнян икымше пелыштыже шуко жапым пашалан пӧлеклыман, а пайремлашке коштын эртарыман огыл. Адакшым тидлан оксамат арам пытараш нимолан. Тиддеч посна йолташда-влак дене ӱчашымаш тарванен кертеш. Диетыш шинчаш келшыше арня.
Скорпион
Тендан деч кугу чулымлыкым да чолгалыкым вучаш тӱҥалыт. Но вий-куатда иземмылан кӧра шуко пашам ыштен шуктен огыда керт. Туге гынат тыршашда логалеш. Уке гын паша гыч луктын колтенат кертыт. Изи икшыве-влак коклаште утларак лияш тыршыза. Нуно вийым ешараш полшат.
Пикшызе
Тыланда кеч-могай правилымат пудыртымо деч шекланыман. Арнян кокымшо пелыже куандарыше лиеш. Сюрпризлан ямдылалтса. Те, мутлан, лотерей дене оксам але иктаж-мом модын налын кертыда. Йӧратыме еҥдат пӧлек дене куандара, очыни.
Ирказа
Могай сомыл шуко оксам арам ыштыме дене кылдалт кертеш, тугайыш ушныман огыл. Тул, тӱрлӧ ӱзгар да арвер дене пайдаланыме годым тӱткӧ лийман. Уке гын эмганен кертыда. Оксам арашат, арымеш пуашат огеш темлалт. Арнян кокымшо пелыштыже ешыште вашкыл саемшаш.
Вӱд йоктарыше
Шӱмбелдан шкенжым утыждене туран кучымыжлан кӧра коклаштыда умылыдымаш лектын кертеш. Пашаште деловой вашкылым пудыртымаш оксам йомдарыме мартет шукта, очыни. Изарнян але кугарнян ты шотышто сӱрет сай велыш вашталтшаш.
Кол
Тыланда тиде арнян неле пашам ышташ огеш темлалт. Тыгак тренажер залышкат лучо ида кай. Тазалыклан кугурак тӱткышым ойырыман. Арнян кокымшо пелыштыже оксада ешаралтеш. Сандене кевытлашкат миен толын да шонымо сатудам налын кертыда.
Ӱпым пӱчкаш тарваненда гын
6 сентябрь. Таче ӱпым пӱчкаш келшыше кече. А теве чиялтеда гын, окса шотышто, воктеныда улшо еҥ-влак дене мутланымаште нелылык лектеш.
7 сентябрь. Ӱпым пӱчмӧ шкан акым ешараш, организмым уэмдаш тӱҥалаш полша. Фитоокрашиванийым ыштеда гын, оксада ешаралташ тӱҥалеш.
8 сентябрь. Тиде кечын ӱпым пӱчмӧ кугу оксам шке деке «шупшаш» тӱҥалаш амалым ышта. Натуральный чия дене пайдаланеда гын, профессионал да усталык пашаште тыланда «кӱшыч» полыш лиеш.
9 сентябрь. Таче модельный стрижке манмым ышташ огеш темлалт – палемдыме пашада лугыч лияш да ышталтде кодаш тӱҥал кертыт. Натуральный гай тӱсыш чиялтеда гын, оксада ешаралтеш, пашаште нелылык огеш лек.
10 сентябрь. Тиде кечын ӱпым пӱчкаш парикмахерскийыш миен толмо деч вара усталык шӱлыш, вий-куат ешаралтмым шижыда. Ошалге тӱсыш чиялтыме полшен кертше «кугу» айдеме-влакым шке деке лишемдаш, тендан семын шонышо еҥ-шамыч дене палыме лияш полша.
11 сентябрь. Таче утларакше вичкыж ӱпан-влаклан у прическым ышташ келшен толеш. А ӱпым чиялтеда гын, тендам вурседылмаш да шинчавӱд веле вучен кертыт.
12 сентябрь. Ӱпым пӱчкаш огеш темлалт. Чиялтеда гын, палымыда да родыда-влак дене кужу жаплан сырен кертыда.
Л.Камалетдинова
