Вургемыште – калыкын ойыртемже

8 декабрьыште Йошкар-Оласе  Калык-влак келшымаш пӧртыштӧ «Тӱвыраште у» форум  кышкарыште «Исток-2024»  ончер-конкурс  почылтын.  Конкурс визымше гана эрта.

– Мемнан илышыштына кызыт  ятыр вашталтыш шижалтеш. Креативный экономике шочын, комфортан у кумдыкым ыштена,  у продуктым шочыктена.  Тыге у тӱвыра шочеш.  Кызыт тачысе илышлан келшен толшо технологийым кучылтмылан кӧра у паша вер-влак лектыт, – каласыш Россий Дизайнер-влак ушем вуйлатыше, академик Виталий Ставицкий.

Конкурсыш элнан 26 регионжо гыч 400 йодмаш пурен. Жюри ик эн сайжым да ойыртемалтшыжым ойырен налын.  Участник-влакын пашаштым «Графике дизайн», «Декоративно-прикладной искусство», «Костюмын, аксессуарын, текстильын дизайнже», «Ола кумдыкысо дизайн», «Коммуникативный дизайн» номинацийлаште акленыт.

Йошкар-Ола гыч дизайнер-влак Елена Емешева да Озаҥ гыч Юлия Манеева вургем коллекцийыштым ончыктеныт. Еленан «Цветущая сложность», ача-авалан пӧлеклалтше «Мыйын шулдырем» коллекцийже-влак поснак кумылым савыреныт. Юлия вургемым, этностильлан эҥертен, 16 ий урга. А «Муза» модо театрын  участикше-шамычын, Озаҥ ола гыч студент-влакын,  «Душегрейка»  вургем коллекцийышт телым чияш лачак келшен толеш, молан манаш гын тудым меж шӱртӧ гыч пидме. Угарман гыч «Городецкий переполох» коллекций калыклан поснак келшен. «Идея» модо театрын мексике калыкын вургемжым ушештарыше «Кармелита» коллекцийже выставкылан ойыртемалтше тӱсым пуртен.

Михаил СКОБЕЛЕВ,

Лидия ШАБДАРОВА

М.Скобелевын фотожо