Илышым умылаш полшымылан веле огыл тауштеныт…
13 январьыште палемдалтше Россий печать кечылан пӧлеклалтше торжественный мероприятий Республикысе курчак театрыште эртен. Моткоч куанле ыле – профессиональный пайремна дене регион вуйлатыше шкежак саламлаш толын. Ты кечым савыктыме продукций, электрон изданий да ТУЙ (СМИ) сферыште тыршыше кажне пашаеҥ пайрем семын акла. Марий Эл вуйлатыше Юрий Зайцев саламлымаштыжат чын палемден: савыктыме, электрон изданий, телевидений да радио деч посна тачысе илышыжым ужашыжат ок лий.
«Историйын вашталт толмо татлаште журналист-влак эре гражданский лӱддымыкылыкштым, шке пашаштлан ӱшанле улмыштым ончыктат. Тӱҥ задачышт – пеш писын чыла лийыше событийым калыклан чын намиен шукташ. Те эре «передовойышто» улыда. Тидын дене те калыкыште шарлен кертше умылыдымашлан мучашым пыштеда», – каласен регион вуйлатышына.
Юрий Зайцевын ойлымыж гыч икте раш: Марий Эл правительстве ончыкыжымат савыктыме пашалан вияҥаш, ТУЙ-влаклан кӱрылтде лектын шогаш полшаш тӱҥалеш. Мут толмашеш, лишыл жапыште «Марий Эл Телерадион» аппаратно-стдийный комплексшым уэмдыме пашам умбакыже шуяш, републикыште лектын шогышо газет-влакым ушышо холдингым ышташ шонымаш-влакым илышыш шыҥдараш тӱҥалыт. Национальный книгам савыктыме пашалан полшаш, кучем орган-влак вуйлатыше-шамычын илышыш шыҥдарыме шотышто проект-влак нерген соцкыллаште уверым шаренак толаш кӱлмӧ нергенат ойлалтын.
Печать дене кылдалтше чыла нине да моло йодыш нерген пайрем мероприятий деч ончыч Марий Эл правительстве пӧртыштӧ регион вуйлатышын республикысе да районласе редакций вуйлатыше-влак дене вашлиймаш годымат мутланеныт. Ончыч Юрий Зайцев тыгак чылаштым профессионал пайрем дене саламлен. Журналист-влаклан Украинысе спецопераций нерген тӱшка калыклан уверым сайын намиен шуктымыштлан тауштен.
«Калыкна чыным палышаш. Лач кызыт тӱняште шкенан илышна, шочмо элнан кӱлешлыкше, тудын верже нерген умылымашна вашталт толеш. Тыште журналист-влакын надырышт моткоч кугу», – каласен тудо.
Ушештарен кодыман, кажне ийын Печать кече вашеш республикысе журналист-влаклан «Марий Эл Республикым социально-экономически вияҥдыме пашам эн сайын ончыктен шогымылан» правительствын премийжылан конкурс иктелалтеш. Тений тудын «Марий Эл Республикыште социальный сферым да мер инициативым ончыктен шогымо нерген эн сай паша» номинацийыште «Марий Эл» газетнан авторский коллективше лектын. А теве «Марий Элыште илыше калык-влакын шкешотан улмыштым ончыктымо эн сай паша» номинацийыште «Марий Эл Телерадио» учрежденийын авторский коллективше ойыртемалтын. Марий Эл Радион тӱҥ редакторжо Владимир Матвеев тений «Марий Элын шӧртньо пераже» премийым сулен.
Торжественный мероприятий годым журналист ден печатник-влакын пашаштым виктарыше, тыгак моло министерстве ден ведомствын еҥышт саламлаш, палемдаш, пӧлекым кучыкташ толыныт. Тӱвыра, савыкытыш да калык-влакын пашашт шотышто министр Константин Иванов ойыртемалтше-влаклан кугыжаныш наградым кучыктен. Тидат куандарыде огеш керт, вет журналист-влак шке пашашт дене тӱрлӧ сферым авалтен палдарат, нунылан мыняр-гынат вияҥаш полшат манаш лиеш. Саламлыше да наградым кучыктышо-влак коклаште Марий Эл правительстве председательын икымше алмаштышыже-влак М.Васютин ден Е.Кузьмин, Марий Эл Кугыжаныш Погын председатель А.Смирнов, ЦИК вуйлатыше И.Татаринова да молат лийыныт.
«Марий Эл» газет редакцийын икмыняр пашаеҥжат тӱрлӧ кӱкшытан награде дене палемдалтын. Мутлан, социальный йодыш дене редактор Маргарита Иванова – Марий Эл Кугыжаныш Погынын Чап грамотшо, тӱвыра йодыш шотышто редактор Алевтина Байкова – Марий Эл правительствын Чап грамотшо, дизайнер-верстальщикна Александр Белоусов – Тӱвыра, савыктыш да калык-влакын пашашт шотышто министертствыжын Чап грамотшо, верстальщикна Евгения Чемекова – ты министерствынак Тауштымашыж дене. Еш да йоча йодыш шотышто редактор Любовь Камалетдинованат сеҥымашыжым ончыктыман. Тудо кугыжаныш кучем орган да мер организаций-влакын коррупций дене кучедалме шотышто темылан возышо журналист-влаклан республиканский конкурсышто сеҥышыш лектын. Российысе «Знание» обществын Тауштымашыж дене мемнан фотокорреспондентна Михаил Скобелев палемдалтын. Туризм да спорт мнистерстват мемнан редакцийлан Тауштымашым кучыктен. Икманаш, «Марий Эл» газет редакцийын пашаеҥже-влакат Печать кечым сай паша лектыш дене вашлийыныт.
Мучаште Россий журналист ушемын Марий Элысе пӧлкаже организаций дене пеҥгыде кылым кучышо журналист-шамычлан тыгак шкешотан, корныш налаш лийше пӧлекым кучыктен. «Мый тендан профессионализмланда да ойырен налме пашаланда ӱшанле кодмылан тауштем. Усталык сеҥымашыш шуаш кугу кумылым тыланем!» – каласен саламлыме годым Юрий Зайцев.
С.Носова
Снимкыште: «Марий Эл» газетын коллективше.
М.Скобелевын фотожо.
