«Илыме вер да ола кумдык» нацпроектын «Оласе йырвелым йӧнаным ыштымаш» федеральный проектше почеш 2022 ийыште тӱзатышашлык кумдык-влакым ойырен налме шотышто Россий Минстрой «Диалог регионы» АНО дене иквереш общефедеральный рейтинг платформым ямдылен. Муниципальный образований-влак тиде платформыш тӱзатышаш кажне объект нерген уверым вераҥденыт. Ончыктымо чыла кумдык регионысо модерацийым эртен, ынде нуным федеральный модерацийыш колтымо.
Марий Элыште 31 территорийым: Йошкар-Олаште 19-ым, Волжскышто 3-ым да Козьмодемьянскыште 9-ым – йӱклымашке лукмо. Теве икмынярже:
ЙОШКАР-ОЛА. Воскресенский паркыште йоча площадкым келыштараш, олымбал, урно, леведыш-влакым вераҥдаш, паркым волгалтараш да велосипед дене кудалыштме корным ышташ палемдыме.
КОЗЬМОДЕМЬЯНСК. Я.Эшпай лӱмеш тӱвыра полат пеленысе скверыште, 8 Март урем мучко шуйналтше каныме аллейыште асфальтым шараш, олымбал да урно-влакым вераҥдаш, нине верлам волгалтараш палемдыме. Тыгаяк паша Юбилейный да Комсомольский уремлаште йолешкылан келыштарыме (стадион деч тӱҥалын «Копир» завод марте) шуктышаш верч йӱклаш тӱҥалыт.
ВОЛЖСК. «Заря», «Северный» да «Дружба» микрорайонлаште тротуар-влакым олмыкташ да асфальт леведышым вашталташ палемдыме.
Йӱклымаш 12.gorodsreda.ru. платформышто 26 апрельыште тӱналеш да 30 май марте шуйна.
Л.СЕМЕНОВА
