«Пӱртӱсыштӧ чон кана, вий ешаралтеш»

Марий Элын калык артистше Эльвира Лисицына Курчак театрыште 35 ий пашам ышта. Ты жапыште тудо шуко спектакльыште модын да кызытат тӱрлӧ рольышто йоча-шамычым куандара, курчак-влаклан «илышым пуа».

Эльвира Марий тӱвыра рӱдерын ямдылыме мультуроклаштыже герой-влакым марла йоҥгалтарен. А эн кугу пиаллан актрисе театрыште пашам ышташ тӱҥалме пагытыштыжак «Чоныштем илет» марий сериалыште аван рольжым модмыжым шотла. Тиддеч посна эше Ленинградыште тунеммыж годым руш, индий кино-влакым йоҥгалтарымаште лийын.

Талантан, уста актрисе пӱртӱсым моткоч йӧрата. Каныш кечылаште але яра жапше годым ече дене кошташ, коньки дене мунчалташ, бассейныште йӱштылаш кумылан.

– Пӱртӱсыштӧ чон кана, уш-акыл яндарештеш, у шонымаш шочеш, паша кумыл, вий ешаралтыт, – манеш актрисе.

А шукерте огыл Эльвира 55 ияш лӱмгечыжым палемден. Юбилейжылан шканже шке кугу пӧлекым ыштен — пашам пырля ыштыше йолташыже-влак дене пырля Шем теҥыз воктеке канаш миен толын.

– Ик арня тушто канышна. Мемнан дене лу-латкум градус йӱштӧ лийын, а тушто – индеш градус шокшо. Йырваш ужарге, мотор… Тушечын 17 январьыште пӧртылынна. Крешене пайремлан Шем теҥыз дене лийына гын, мутат уке, пулвуй марте вӱдыш пурен лектына ыле, – воштылеш Эльвира. – А ик гана 19 январьым Египетыште вашлийынам. Тушто шокшо лийын, сандене сайынак йӱштылынна, эсогыл Средиземный теҥыз йымалне кораллым онченна.

Ты гана Э.Лисицына Крешеньылан Марий кундемыштак лийын.

– Пайрем кечын ече дене Изи Какшан эҥер воктене коштынам, кас велеш шнуй вӱдым налаш черкыш пурен лектынам, а кастене родо-тукым дене пайрем ӱстел йыр чумыргенна, – каласыш актрисе.

Газетнам лудшо йолташна-влаклан Марий Элын калык артистше деч тыгайрак тыланымаш лиеш:

– Кажне татлан куанен, лишыл еҥым, палымым, родо-тукымым йӧратен, икте-весым пагален, порым шонен илаш, кажне кечым куанен вашлияш тыланем. Тек эре чевер кече шыргыжеш, чыла сай гына лиеш!

А.Байкова.

Фотом еш альбомжо гыч налме