СОЦИАЛ ИЛЫШ

Оза улмо ӱмбач «озадыме» ынже лий

 Пытартыш ийлаште мланде дене пайдаланыме законодательстве кузе шукталтмым  тергыме пашам Росреестрын Марий Элысе управленийжын госземинспекторжо-влак кумдан эртарат. Тений икымше пелийыште гына 152 вере лийыныт. Тергыме годым 122 гана законодательствым пудыртымым пален налыныт. Тышеч нылытшым юридический лицо, 115 нарушенийым еҥ-влак, кумытым должностян еҥ-шамыч ыштеныт. 89 нарушительым мут кучаш шогалтеныт, нунылан чумыржо 776 тӱжем теҥге штрафым тӱлаш пуэныт.

— Ончычо семынак, мланде законодательствым ик эн кугун пудыртымо титаклан участке-влакым шкевуя поген налмаш шотлалтеш. Тыгодым тидым ыштыше еҥ, юридический лицо-влакын мланде дене закон дене келшышын пайдаланаш нимогай правашт ден документышт уке, — умылтара Росреестрын Медведево ден Килемар районласе отделжын начальникшын алмаштышыже, управленийын кугыжаныш инспекторжо С.Буклаева. – Талук тӱҥалтыш гыч мландым шкалан тыге налме 86 фактым рашемдыме.

Верлаште тергыме годым эше теве мо палдырна: юридический лицо але тыглай еҥ мланде участкым шукертак налыныт, яллаште тудым шке жапыштыже ялозанлык предприятий-влак срокым палемдыде пайдаланаш пуэныт. Но южышт ты участкым шке ӱмбакышт кызыт мартеат возен огытыл, келшыше документышт уке але федеральный законын йодмыж почеш  арендыш налаш правалан але собственностьыш савыраш документым угыч возен уэмдаш жапым муын огытыл. Кызыт тыгай мланде участкат шке гыч поген налме радамыш лектеш. А тидыже – нарушений. Тидлан РФ-н Административный правам пудыртымо нерген кодексше дене келшышын административно мут кучаш шогалтат, изи огыл штрафым тӱлыктат.

Законым пудырташ огыллан специалист-влак теве мом ышташ темлат: ойырымо мланде участке дене тудын айлыме чек кӧргыштӧ гына пайдаланыман. Чекым палемдыме огыл гын, тушто кадастр пашам: межам рашемдыме, топографический съемкым ыштыме, участкым висен налме, моло сомылымат — шуктыман. Тидым кадастр инженер-шамыч ыштат. Нуным увертарымаш гоч муаш неле огыл. Кадастр пашан результатшым недвижимость шотышто Единый кугыжаныш реестрыш пуртыман.

«Межеванийым ышташ кӱлешыже уло мо?»  йодын кертеш южо еҥ. Вашмут икте – кӱлеш. Молан манаш гын 2018 ий 1 январь гыч вийыш пурышаш у закон дене келшышын, межам палемдыме деч посна мланде участке дене пайдаланаш чаралтеш. Ты законжо «Об определении точных границ земельных участков и местоположения зданий, сооружений, объектов незавершенного строительства и о внесении изменений в некоторые законодательные акты РФ» маналтеш.  Ты закон вер гыч верыш кусараш лийдыме погылан кадастр учетым ыштымаште кугыжаныш услугын качествыжым нӧлталаш да недвижимостьлан кугыжаныш регистрацийым да сделкым ыштыме пашам  саемдаш полшышаш. Мландым кучышо озан участкылан кадастр планже уке гын, тудын кушеч тӱҥалмыжым да мыняр шуйнымыжым каласашыже неле. Тылечак пошкудо дене нимучашдыме туманлымаш лектеш, суд мартеат ик гана веле огыл шуыт. Сандене кадастр инженер-влакым ӱжын геодезий пашам шуктымаш арам ок лий.

Тидын годым предприниматель пашам шуктышо юридический лицо-влак мланде участке дене эреак (срокым палемдыде) пайдаланаш ты мландым арендыш налаш правалан документым оформитлышаш але участкым собственностьыш налшаш улыт. Тидымак мланде участкан еҥ-влак ыштышаш улыт. Мландым недвижимость шотышто Единый кугыжаныш реестрыш пуртымо нерген документет уке гын, тудым ны наследство семын коден, ны ужален от керт.

— Мландылан документ уло-укем тергыме годым тудын озаже улмо ӱмбач участкым «озадымылан» шотлымо гын, ты экшыкым кораҥдаш предписанийым возена да тӧрлаш срокым палемдена. Но южо еҥже госземинспектор-влакын кӱштымыштым огеш  шукто, тыге шкенжым кугу йӧндымылыкыш луктеш, — рашемда С.Буклаева. – Мланде законодательствым пудыртымым кораҥдыме шотышто предписанийым палемдыме срокышто шуктыдымылан еҥ-влаклан 10 гыч 20 тӱжем теҥге марте штрафым тӱлыктат. Должностян еҥ-шамычлан 30 гыч 50 тӱжем теҥге марте штрафым тӱлаш ыштат да нуным кум ий марте паша гыч кораҥдат. Юридический лицом 100 гыч 200 тӱжем теҥге марте штраф вуча.  

Талукышто тыгаяк правонарушенийым угыч ыштымылан наказаний эшеат пеҥгыдырак. Еҥ-шамычым 30 гыч 50 тӱжем теҥге марте штраф, должностян еҥым 70 гыч 100 тӱжем теҥге марте штраф да кум ий марте дисквалификаций, юридический лицом  200 гыч 300 тӱжем теҥге марте штраф вуча.

Росреестр управлений нарушенийым ыштыше еҥ-влаклан титакыштым палемдыме жапыште кораҥдаш темлат. Наказаний чынжымак кугу. Таҥастараш: эше кодшо ий март марте штраф кугыт нунылан улыжат 500 теҥге лийын. Мланде участкым шке ӱмбакет возенат да документет уло гын, нимолан тургыжланаш: тудын дене кеч-могай сделкым шонымет семын ыштен кертат.

А.АНДРЕЕВ.

Снимкыште: кадастровый инженер-влак межеванийым ыштат.

(Фотом Интернет гыч налме).

Опубликовать в Одноклассники

Добавить комментарий