Эрыктет – пушеҥге йӧрлмӧ деч утлет
«Рӱдӧ да Юл кундем Россеть Мариэнергошто» электролиний шуйналтме пысманлам тений икымше пелийыште эрыктыме да кумдаҥдыме пашам иктешлыме.
Компанийын электросетьше кокла гыч кугу ужашыже чодыран верла дене эрта. Пушеҥге кушмо але йӧрлмӧ амал дене кӱрылтыш ынже лий манын, энергетик-влак трассым эрыкташ ий еда шагал огыл вийым да средствам кучылтыт.
Эн кугу паша 35-110 киловольт куатан электролиний шуйналтме верыште ышталтын – тушто 190 гектарым эрыктыме. Тыгай пашам Медведево, Волжский, Килемар, Звенигово, Килемар, Юрино, Советский, Шернур районлаште шуктымо. Икымше пелийыште чылаже 244,5 гектарым эрыктыме да кумдаҥдыме.
Ты пашаште энергетик-влак жаплан келшыше спецтехникым, тидын шотыштак мульчерым, кучылтыт. Тудо вондерлам шанчашыш савыра да тушанак шӱяш кода.
«35-110 киловольт куатан электролиний-влак район ден кугу илем-влаклан электровийым ситарен шогат. Пушеҥге йӧрлмӧ дене кӱрылтыш ынже лий манын, трассым эрыктыме пашам кокымшо пелийыштат шукташ тӱҥалына», — палемден «Рӱдӧ да Юл кундем Россеть Мариэнерго» директорын пашажым шуктышо Сергей Хлусов.
Ю.ИСАКОВ
