Тиде арнян Марий Элыште коронавирус дене черланыше-влакын чотышт иземын.
«16,2 процент лийын да эртыше кок арня деч палынак иземын. Ик черланышат огеш лий гын, вияш линийыш (плато) лектына. Коронавирус 65 ий деч кугурак 52 еҥым авалтен, инфицироватлалтше-влак кокла гыч утларакше 29-55 ияш-шамыч улыт. 82 еҥ черланымыжым йӧршын огеш шиж, 152 гражданын черже куштылгын эрта, 81 еҥын состоянийже «нелылыкын кокла йыжыҥже» семын аклалтеш, 18 черле шкенжым палынак начарын шижеш», — Марий Элышке коронавирус инфекцийым кондымым да шаркалымым шижтарыме шотышто опреативный штабын черетан заседанийыштыже Роспотребнадзорын Марий Элысе виктемжым вуйлатыше Светлана Булатова статистике дене палдарен.
Марий Элын тӱҥ санитарный врачшын мутшо почеш, республикыштына утларакше вес кундем гыч кондымо случай-влак регистрироватлалтыт. 23 апрель марте 33 тыгай случайым рашемдыме. Тӱҥ задачылан тӱшкан черланыме деч эскералтме шотлалтеш, сандене кугу тӱткыш системообразующий манме предприятий-влаклан ойыралтеш. Тачеш тушто чыла темлымашым шуктат.
Черланыше-влакым, нунын дене кылым кучышо-шамычым писын рашемдыме, чарыме чыла мерым жапыштыже приниматлыме дене лишыл жапыште ситуацийым саемдаш ӱшан уло, манын регионым вуйлатыше.
«Кызытеш ны койко-вер, ны кадр, ны технический обеспечений, ны шкем аралыме средстве шотышто нелылык уке. Республикыштына коронавирус дене черланыше-влакын чотышт вахте паша гыч пӧртылшӧ да нунын дене кылым кучышо-влаклан кӧра кугемеш. Ик арня гыч пеҥгыде позицийыш лекташ тӱҥалына манын ӱшанем», — палемден А.Евстифеев.
Марий Элын Тазалыкым аралыме министрже М.Панькован увертарымыж гыч, пытартыш ныл кечыште стационарлашке утларакше пневмоний дене черланыше-влакым пыштыме. Тыгодымак пациент-шамычым эмлыме дене кылдалтше сай динамикан изи сеҥымаш-влакат улыт.
«Кужу жап эмлыме деч вара таче ИВЛ аппарат деч кокымшо пациентым кораҥдаш ямдылена. Икымше пациент шодым искусственно вентилироватлыме йӧн дене 11 сутка шӱлыш, кокымшо – 10 сутка. Тиде пеш неле черле-влак ыльыч. Нуным эмлыме шотышто федеральный рӱдер дене ик гана веле огыл каҥашенна, да пырляште сай результатыш шуынна. Таче кечылан тиде — мемнан докторна-влакын суапышт», — палемден Марина Викторовна.
Оперштабын заседанийыштыже медперсоналым у коронавирус инфекций шотышто ешарен туныкташ да медпашаеҥ-шамычлан шкем аралыме чыла средствым ситараш каласыме.
Марий Элым вуйлатышын организаций да
аналитике виктемжын уверже негызеш М.ИВАНОВА ямдылен
