РУБРИКИ

2018 ий – Волонтёрын идалыкше: Ме огыл гын, кӧ?

Теве тыгай лозунг дене Кужэҥер районын волонтёржо-влак илат. Но школышто тунемше-шамыч веле огыл… 

Доброволецын (волонтёрын) идалыкшылан пӧлеклалтше районысо форум поро пашам ыштыше-влак коклаште предприятий, тӧнеж, организаций, ола да ял шотан администраций вуйлатыше, ветеран да моло-шамычымат рашемден.

Нуно чыланат шочмо верым тӱзатыме пашам иктешлаш, кундемысе илышым саемдыме шотышто тӱрлӧ шонымашым лончылаш ик залыш погыненыт. Тиде цель дене кум площадке – «Ончыкылыкын волонтёржо-влак», «Ший ийготын волонтёржо-шамыч» да «Граждан-влакын тӱҥалтышышт» – пашам ыштен.

Российыште 2018 ийым Доброволецын идалыкше семын увертарыме. Тидыже волонтёр-шамычын пашаштым чапландараш, кумданрак ончыкташ – сай йӧн.

Кужэҥер районысо волонтёр толкыныш посёлкысо Ешартыш шинчымашым пуымо рӱдер пеленсе «Пырля ме вий улына» отряд эн ончыч ушнен. Тудым Елена Данкина вуйлата. Отряд кандашымше ий пашам ышта. Кызыт районышто кумдан палыме Юлия Батухтина, Кристина Никитина, Елена Иванова гай лидер-влак лачшымак тиде организацийыште шуаралтыныт.

Районышто волонтёр толкын ий еда пеҥгыдемын да кумдаҥын толеш. Тушко у деч у еҥ-влак ушнат. Волонтёрын идалыкшым торжественно почмо годым поро пашам шуктышо-влак радамыш эше вич ӱдыр ден рвезе ушнен. Нунылан личный книжкам торжественно кучыктымо. Ынде районышто 260 тимуровец уло. Икымше номеран волонтёрлан Анастасия Березина шотлалтеш. Тудо – районышто тыгай «корочкым» налше икымше доброволец.

«Куженерский» аграрно-строительный техникумын филиалыштыже студент-шамычын волонтёр отрядышт ынде кумшо ий пашам ышта. Тудо социально-кӱлешан кум проектым илышыш пурта. «Иле памаш илыше вӱд дене», «Поро пашам ыштыме корно» проектла почеш обелиск ден памаш-влакым тӱзата. А «Шкет айдемыдыме пӧрт» проект кышкарыште ветеран ден илалше-влак деке лектын коштеш. Тыштыже педагогышт Антонида Малининан, Антонина Заузолкован да Ираида Тетеринан тыршымыштым сай велым палемден кодаш кӱлеш.  

Таче волонтёр-влак поро пашам ыштымышт деч посна эше икте-весе, социально-кӱлешан еҥ-шамыч дене палыме лийыт. Тыгай эксперт-шамыч коклаште «Акашевский» сурткайык фабрикын социальный вияҥмаш да корпоративный паша шотышто пӧлкажым вуйлатыше Татьяна Минейчевам палемдыман. Тиде предприятий уста икшыве-влаклан поро кумылын полшымыж дене шергакан. Шке жапыштыже тудо музыкант Костя Шарнинлан кызытсе жаплан келшыше баяным, Руш Шой школ-интернатлан у кроватьым налын пуэн. Агрохолдингын поро кумылын ыштыме паша спискыже кужу.

Татьяна Владимировна форумышто участвоватлыше ӱдыр-рвезе-влаклан оҥай шонымашым илышыш шыҥдараш полшымо нерген йодмашым грамотно возаш туныктен, Президентын грант программылашкыже ушнымо икымше ошкылжо нерген радамлын каласкален. Тудым колыштын, районын лидерже-влак ончыко ошкылаш таратыше у вийым, у шӱлышым шижыныт.

Форум районысо ятыр йодышым решатлыме шотышто пайдале ой-каҥашым темлыме да нуным илышыште кучылташ кутырен келшыме дене мучашлалтын.  

М.ИВАНОВА.

Опубликовать в Одноклассники

Добавить комментарий