Россий Федераций президент В.Путинын тӱҥалтышыж почеш Марий Элыште «Земский туныктышо» программе илышыш умбакыже шыҥдаралтеш.
Тений 10 январь марте районласе администраций вуйлатыше-влакын йодмашышт почеш вакансий спискым ыштыме. Тыге порталтыште ялласе школыш 45 туныктышо кӱлмӧ нерген увертарыме.
2020 ий 10 январь гыч 15 апрель марте Марий Элыш пашам ышташ толаш кумылан-влак деч чылаже 47 йодмаш пурен: Санкт-Петербург, Моско, Озаҥ, Самара, Оренбург, Удмуртий, Краснодар край да моло кундемла гыч.
15 майыште комиссий программын сеҥышыже-влакым палемден. Тений гыч мемнан кундемысе ялысе школлашке (Звенигово, Курыкмарий, Марий Турек, У Торъял, Оршанке, Советский да Юрино районласыш) чумыр налмаште 13 «земский туныктышо» пашам ышташ толшаш.
Ушештарена, тиде программыш ушнышо, тушто сеҥыше да варажым чынжымак ялысе школышто пашам ыштыше педагоглан ик миллион теҥгем пуат. Тений тидым 1 декабрь марте ышташ палемдыме.
Г.КОЖЕВНИКОВА
