«МАРИЙ ЭЛ» ТАЧЕ

12 тылзе – 12 лаштык

Республикысе Марий юмыйӱла ушем 2024 ийлан «Марий юмыйӱлан кечышотшо» календарьым савыктен.
Марий кечышотан тыгай савыктышын кӱлешлыкше шукерте огыл Йошкар-Олаште эртыше этонофорумыштат шижалте. Тӱшкан илыме марий кундемла гыч толшо участник-влак марла календарьым кушто налаш лийме нерген икмыняр гана йодыч.
Идалыкысе 12 тылзылан пӧлеклалтше 12 лаштыкан календарьым тений поснак ойыртемалтшым ыштеныт. Марий Элысе да Пошкырт кундемысе Марий юмыйӱла ушем-влакын архивышт гыч налме фотосӱрет-влак дене сӧрастарыме. Кажне лаштыкыште, пагыт дене келшышын, марий еҥлан илышыште тӱрлӧ амаллан кӱлеш лийше кумалтыш мут-влакым чумыреныт: вольыкым кӱтӱш лукмо, Кугече, мланде пашам тӱҥалме, армийыш ужатыме, азалан лӱмым пуымо годым да молымат…
Ончыл лаштык Юмыйӱла ушемын тӱҥ онаеҥже Александр Таныгинын У ий дене саламлымаш дене почылтеш. Тений марий кечышот радам почеш Йӱксӧ идалык лиеш. Ты кайык мыланна мом сӧрымӧ нергенат календарь гоч пален налына.
С.Носова
Снимкыште: Марла календарь

Опубликовать в Одноклассники

Добавить комментарий