«Кырык мары цаш» передачылан – 10 ий! Тудым М.Шкетан театрын артистше Марина Почтенева вӱда.
Тидын лўмеш 23 мартыште Патриарший площадьыште «10 ийлан – 10 уштыш!» келшымаш таҥасымаш эртаралтын.
Тушко кумылан спортсмен, таза илыш-йӱлам йӧратыше, ты передачын унаже да колыштшо-влак ушненыт. Иктым куанен палемдыме шуэш: куржталмаште СССР-ын вич спорт мастерже лийын. Нунын коклаште ече дене СССР-ын спорт мастерже Софья Черномазова, куштылго атлетике дене спорт мастер Контсантин Лукьянов, Александр Танников, кира спорт дене спорт мастер Александр Замковым палемдыман. Участник-влак деке Марий Эл Республикын икымше марий президентше В.Зотин (1991 ий декабрь – 1997 ий январь) кумылын ушнен.
Чылажат сай да поро шӱлыш дене эртен.
Спортын ӱшанле йолташыже, куштылго атлетике да ече дене пеҥгыде кылым, икманаш, таза илыш-йӱлам кучышо Марина Почтеневам шукынжо М.Шкетан театрын артистше семын палат. А тиде чолга ӱдырамаш – радиовӱдышо, спортсмен, тале ечызе. Телым Йошкар-Оласе «Корта» ече базыште лийше-влак чӱчкыдынак тудым ешыж дене ужаш лиеш. Воктечет пикшла чымалтеш.
– Чылажат изиэм годым тӱҥалын, школышто тунемме жапыште, чапле спорт зал лийын огыл, но школ пеленысе садыште телым тунемше-шамыч шкеак коньки да классик йӧнлан келыштарен ечыгорным ыштенна, мунчалтенна. А мланде почылтмеке куржталынна. Кызыт шукышт компьютер воктене яра жапым эртарат. Куржталын але ечыгорнышто мунчалтен, уш-акылжат пеҥгыдемеш, кӧргӧ кислород дене пойдаралтеш. Тидыже пашалан, чынжымак, полша. Уке гын кажне кечын – театр да мӧҥгӧ. Эре движенийыште лияш тыршыман, – манеш шкеже.
Уста еҥ чыла шотыштат уста, маныт. Тиде ой Мариналан пеш келшен толеш. Налаш теве сценыште модмыжым, сылнын муралтымыжым, радиошто передачым вӱдымыжым, ечыгорнышто чымалтмыжым… Чыла вереат кәӱкшыт уло. А моторлыкым пӱртӱс юмак пуэн.
– Моторлык шотышто ойлаш гын, мыйын шонымаште, эреак тарванылме, спортын кеч-могай видше дене заниматлалтме кап-кылым лывырташ, шкем формышто кучаш полша, а коваште сай лийже манын, яндар вӱдым йӱман, – манеш М.Почтенева.
Мары эдем ит шекланы
Марла попаш нигыштат.
Тек йылмына ак тыпланы
Солаштат да халаштат…
А.Канюшковын ты почеламут корнылаж дене тӱҥалеш кажне «Кырык мары цаш» передачыже.
Лу ий! Шагал ма, шуко… Умбакыжат Марина ты сапшым пеҥгыдын кучаш, марий, курык марий калыкым куандараш, у увер дене палдараш тӱҥалеш манын ӱшанен кодына.
Е.ЭШКИНИНА
