Россий Федерацийын Тазалыкым аралыме министерствыжын полшымыж дене Андрей Первозванныйын фондшо «Святость материнства – 2019» конкурсым эртара. Тудо ава улмым да йоча пагытым аралымашке, икшыве шочмо чотым азам ыштен кертше ӱдырамашын мӱшкыраҥмыжым арален кодымо дене кугемдымашке виктаралтын.
Конкурсышто акушерско-гинекологический профилян кугыжаныш да муниципальный медицине организаций, социальный обслуживаний тӧнеж-влак, врач-акушер-гинеколог, ӱдырамашлан мӱшкыран улмыж жапыште полшышо психолог (медицине психолог)-шамыч ушнен кертыт.
Конкурс тыгай номинаций-влак дене эрта:
- «Эн сай врач-акушер-гинеколог» (тӱҥ йодмаш – абортым ышташ толшо ӱдырамаш-влакын шӱмышт йымалне иланыше азам арален кодаш);
- «Аборт деч ончыч мутланыше эн сай психолог»;
- «Неле илыш ситуацийыште улшо мӱшкыран ӱдырамаш да еш-шамыч дене социальный пашам шуктымо шотышто эн сай специалист»;
- «Аборт деч ончыч консультацийым эртарыше да сотемдарыме сомылым шуктышо медицине ден мер организаций-влакын команде дене шуктымо эн сай пашашт» (икте-весе дене ваш кутырен келшен шуктымо паша).
Конкурсышто участвоватлаш шонышо-влак йодмашым 2019 ий 1 сентябрь йотке пуышаш улыт. Призын фондшо – 1 млн. теҥге.
М.ИВАНОВА