«Мишкан – финн-угор тӱнян тӱвыра рӱдыверже» проект кышкарыште финн-угор калык гыч улшо самырык мурызо-влаклан «Яндар йӱк» онлайн-конкурс иктешлалтын.
Эпидемий шарлымылан кӧра мурызо-влакын мастарлыкыштым колтымо видеозаписьлан эҥертен гына акленыт. Конкурсыш 15-35 ияш мурызо-влак ушненыт. Кажныже эстрада але калык мурым мурен ончыктен. Чылаже Марий Эл, Киров область, Башкортостан гыч 18 участник погынен. Гран-прим Янаул ола гыч Ольга Николаева сеҥен налын.
Икымше степенян лауреат лӱм дене Пошкырт кундемысе Калтаса район гыч Кристина Русиева дене пырля Оршанке район гыч Виктория Мочаловат палемдалтын. Кокымшо степенян лаурет лӱм дене тыгак мемнан республикысе Морко район гыч Николай Сидоров да Курыкмарий район гыч Руслан Капитонов палемдалтыныт. Кумшо степнян дипломым сулышо-влак коклашке Медведево район гыч Диана Николаеват логалын.
С.НОСОВА
