Шушаш шошын вӱдшор тылзыштыже Марий калыкын XI погынжо лийшаш. Тидын шотыштак Марий Эл правительствыште тудлан ямдылалтме да тудым эртарен колтымо шотышто республиканский оргкомитетын икымше заседанийже эртен. Тудым Марий Эл Правительстве Председательын икымше алмаштышыже Михаил Васютин вӱден.
Каҥашыме йодыш дене кылдалтше доклад-влакым Мер Каҥаш вуйлатыше, Оньыжа, оркомитет председательын алмаштышыже Эдуард Александров да тӱвыра, савыктыш да калык паша шотышто министр Константин Иванов ыштеныт. Темлымышт почеш погынлан ямдылалтме да тудым эртарен колташ полшышо пашаче тӱшка-влакым ыштат. Верлаште погын дене кылдалтше делегат- влакым сайлыме конференций-влакым эртарен колташ муниципальный район администраций вуйлатыше-шамычат полшышаш улыт. Тидын шотыштак республик деч ӧрдыжтӧ тӱшкан илыше марий-влак деке серыш-влакым колтыман…
Тӱвыра, савыктыш да калык паша шотышто министерствылан Йошкар-Ола администраций дене пырля марий рӱдолаштына лӱмлӧ мер да тӱвыра пашаеҥ-влак И.П.Петровлан, А.Я.Эшпайлан, В.Х.Колумблан шарныктышым ышташ да шогалташ манын, конкурсым увертарышашлан проект да смете документацийым ямдылаш темлыме. Тыгак марий мер илышыш изи огыл надырым пыштыше еҥ-шамычым палемдаш манын, спискым ямдылыман.
Заседанийыш погынышо-влак оласе администрацийлан Х Погынын резолюцийже дене келшышын, марий рӱдолан ик сквержылан икымше марий газетым негызлыше П.П.Глезденёвын лӱмжым пуаш темленыт. Тидым 1 январь марте илышыш пуртышаш улыт.
Марий калыкын XI погынжым ямдылен да эртарен колтымо дене кылдалтше паша план кугу. Верлаштат делегат-влакым сайлышаш улыт. Мемнан газет редакцият моло савыктыш семынак тудын вашеш посна выпускым ямдылышаш. Марий толкынын вияҥмыж нерген каласкалыше ончерат почылтшаш. Икманаш, паша шуко, роскотшат изижак огыл лийшаш.
С.НОСОВА
