Башкортостанысе Дӧртыльӧ район Йывачъял калык шочмо ялжын 260 ияш лӱмгечыжым 10 июньышто палемден. Пайремлан ончылгочак ямдылалтме, Куккуян ялсовет ден район администраций чот полшеныт: ялыш пурымо корно тӱрысӧ печым уэмденыт, йоча-влаклан модашышт кудывечым йӧнештареныт. Корно пашаеҥ-влак Йошкар-Ола урем гыч шӱгарла марте шуйнышо асфальт корным тӧрлатеныт.
Пайрем вашеш ял нерген у книга ош тӱням ужын, тиде лу ий ончыч савыктымым тӧрлымӧ, ешарыме. Тыгак клуб воктене у обелискым шогалтыме. Ял пайрем тудым торжественно почмаш дене тӱҥалын. Тошто обелиск кодшо курымысо 80-ше ийла тӱҥалтыштак ыштыме лийын. Ынде Кугу Отечественный сареш вуйым пыштыше, тушеч сеҥымаш дене пӧртылшо-влакын лӱмышт дене пырля Афганистаныште,Чечняште лийше рвезе-влакын лӱмыштым пуртымо.
Ялын лӱмгечыж дене район администрацийым вуйлатыше Ринат Хайруллин саламлен. Вара школ пырдыжеш С.Сафаровлан шарнымаш оҥам сакыме. Сайфан Захарович верысе школышто 1957 ийыште туныкташ тӱҥалын. 1959 ий гыч 1994 ий марте (неле черлан кӧра илыш гыч ондак каен) директор лийын, «Россий Федерацийысе калык образованийын отличникше» почетан знак дене палемдалтын.
Варажым ял пайремым Сабантуй шуен. Уна-влаклан чайым йӱктеныт, верысе «Калык сем» ансамбль концертым ончыктен. Пошкудо Кушнаренково район Саит ял гыч мурышо коллективат Йывачъял калыкым чапле лӱмгечыж дене саламлен. Кастене ял калыкым, уна-влакым районысо тӱвыра пӧртын пашаенже-влак вашлийыныт, «Шокто, гармонь» пайрем программе дене куандареныт.
Мутат уке, тыгай пайремым ямдылен да эртарен кертше вуйлатыше кӱлеш. Йывачъялыште уста организатор семын Владислав Сафаров палыме. Тудо ятыр ий школым вуйлатен, кызыт ял старосто, районысо марий-влак ушемын пашажым вӱда. Ялым тӱзатымаште Владислав Сайфановичын надырже кугу. Пӧръеҥ шкенжын, пошкудын, ял калыкын тукымвожыштымат шымлаш жапым муэш, Бирск пединститутын преподавательже Игорь Гареев полшымо дене ял нерген книгам лукмаштат тыршен.
Е.ГАЗИНА.
Авторын фотожо.
Снимкыште: Йывачъялын лӱмгече парйемже изимат, кугумат шке помышешыже чумырен.
