Шернур район Шӱдымарий школышто лийме годым ты оралтыштак верланыше тӱвыра пӧртыш пурен лекна. Мемнам клубым вуйлатыше Галина Филипповна Петухова порын вашлие. Тудын дене ялысе тӱвыра сомыл кузе вораныме нерген мутнам вашталтышна.
— Шӱдымарий тӱвыра пӧртым ынде визымше ий вуйлатем. Тӱҥалтыште тудо селасе клуб маналтын, лач ӱмаште школ оралтыш куснымеке гына лӱмжым вашталтен. Кермыч полатыште шинчена гынат, ала-молан чон тошто клубышкемак шупшеш. Калыкат тушко кумылынрак коштын, молан манаш гын пу оралте Шӱдымарий кундемысе ялла коклаште, покшелнырак, шинчен, еҥ-влаклан кошташат йӧнанрак лийын. А школжо ялла деч ӧрдыжтырак шинча, сандене калык шагалрак погына. Ӱшанем, еҥ-влак тунем шуыт да эртарыме мероприятийышкына шукынрак ушнаш тӱҥалыт, — мане Г. Петухова.
Уэмдыме тӱвыра пӧртым меат ончал савырнышна. Чынжымак чыла шотыштат йӧнан. Залымат сайын келыштарыме: кок класс кокласе пырдыжым кораҥдыме. Сандене тушко иктаж шӱдӧ еҥ погынен кертеш. Вуйлатышын пӧлемжат моткоч волгыдо. Мийымына годым тушто лачак ансамбльын участницыже-шамыч шушаш мероприятийым кузе эртарымым каҥашат ыле.
Тӱвыра пӧрт пелен «Кумыл оҥгыр» ансамбль уло. Тушко индеш еҥ коштеш. Утларакшым илалшырак ӱдырамаш-влак ушнат. Нуно моткоч чолга улыт, чыла мероприятийыште усталыкым ончыктат. Районлашкат чӱчкыдын лектыт.
— Мемнан деке вес район гычат, оласе артистат чӱчкыдын толыт. Калыкын икоян улмо кечыжым, Инвалид-влакын декадыштлан пӧлеклалтше пайремым сайын эртарен колтенна. Марисола ял шотан илем администрацийым вуйлатыше Михаил Максимов толын ыле. Аван кечыжлан оҥай мероприятий лие. Тушто лу ава тӱрлӧ оҥай таҥасымаште мастарлыкшым, пӱсӧ уш-акылжым КВН модмаште ончыктен, — палдарыш тӱвыра пашаеҥ.
Кумданрак — «Марий Эл» газетын
2017 ий 9 декабрьыште лекше номерыштыже лудын кертыда.
Л.ШАБДАРОВА.
М.Скобелевын фотожо.
