Шочмо ялын, кундемын ончыкылыкшо да тачысе кечыже тендам тургыжландара? Тугеже Селасе самырык-влакын Россий ушемжын Марий Элысе отделенийышкыже ушныза. Тидым ышташ Йошкар-Ола, Ленин проспект, 29, 705.3 пӧлем адрес дене миен толза, але 89026648122 номерыш йыҥгыртыза.
Ты организаций Россий мучко 12 ий пашам ышта. Марий Элыште 2018 ийыште «шочын». Нунын тӱҥ пашашт – самырык-влаклан ялым, селам тӱзаташ полшаш. Тидыжым тӱрлын ышташ лиеш: икте кумдыкышто шӱкым эрыкта, весе иктаж кӱлешан проектым воза да илышыш шыҥдараш шона.
«Ушемышкына социал да экономике могырым ялым вияҥдаш шонышо-влакым вучена. Кажне районышто отделенийым почаш кумыл уло. Таче кечылан Курыкмарий да Советский районла дене кылым кучена.
Пашам тӱрлӧ могырым вораҥдена: кумдыкым эрыктена, студент, школышто тунемше-влак дене вашлиймашым эртарена, тӱрлӧ акцийыш, проектыш ушнена», – палдарыш ты организацийын ик участникше Дина Саляхутдинова. Динам, ты ушемын социал лаштыклажым вӱдаш ӱжыныт. Жаплан толшо Морко ӱдырлан ты паша келшен. Ынде тушто тыршымыжлан ик ият лиеш.
Ялыште илаш кызыт чыла могырымат йӧн уло: газ пура, вӱд оласе семынак кран йымач йога, интернет писе. Тыге пӱртӱс коклаште илен шке бизнесымат чоҥаш лиеш. Тидлан тӱрлӧ проект, конкурс, программе-влак улыт. Нуным лач кычал моштыман але палыше-влак дене кылым кучыман. Селасе самырык-влакын ушемышт увер полышымат пуаш ямде.
О.МОШКИНА
