КАЛАСЕ, "МАРИЙ ЭЛ"

Юрист умылтара: Паша гыч колтынешт…

Мыйым шке кумылын паша гыч колтынешт. Тыгай годым мом ыштыман? 

И.Иванова.
Йошкар-Ола.

Йодышлан Йошкар-Ола прокурорын алмаштышыже В.С.Птицын вашештен:

— РФ-н Паша кодексшын 78-ше,80-шо,81-ше статьялаж дене келышышын, мутланен келшыме почеш, паша ойпидышым кок велжат кеч-могай пагытыште кӱрлын кертыт. Паша кодексыште але моло федеральный законышто моло чарак уке гын, пашаеҥ ойпидышым кӱрлымыж деч ончыч пашам пуышым кок арня  ончыч кагазыш йодмашым возен шижтарышаш. Тиде срокшо тудын пашам пуышылан йодмашым возымеке, вес кечынже, тӱҥалеш. А ойпидыш пашам пуышын тӱҥалтышыж почеш ойпидыш кӱрылтеш гын, ты шотышто РФ-н Паша кодексшын 81-ше статьяштыже ончыктымым шотыш налыт. Законодательствыште ончыктымо амал уке гын, пашам пуышын тӱҥалтышыж  почеш паша гыч колтымаш закон дене келшен ок тол.

Пашаеҥым шке кумылын паша гыч колташ тыршымым але тудын чапшым волытымым законлан келшен толдымылан шотлат. Кӱшнӧ ончыктымо норматив ок шукталт гын, пашаеҥ келшен толшо йодмаш дене Марий Эл Республикын Кугыжаныш паша инспекцийышкыже, Йошкар-Олан прокуратурышкыжо лектын кертеш. Тыгак шке праважым арален налаш манын, судыш йодмашым пуэн кертеш.

Опубликовать в Одноклассники

Добавить комментарий