Марий Эл вуйлатыше Александр Евстифеев Йошкар-Ола уремла мучко кудалышт савырнен да еҥ-влакын коронавируслан кӧра увертарыме самоизоляций режимым кузе шуктымыштым терген.
Общественный питаний заведений, рознице дене ужалыше кевыт ден ужалыме рӱдер-влак кокла гыч шукыжо петырыме улыт. Но южышт Россий президентын да республикысе указыштым шуктен огытыл да, нуным шотыш налде, тугак пашам ыштеныт.
Ола мучко ончен савырныше межведомственный группышто полиций, Роспотребнадзорын Марий Элысе управленийжын пашаеҥже, Йошкар-Ола администраций гыч еҥ-влак лийыныт. Нуно рейд жапыште 10 утла ужалыме верым тергеныт. Тыгодым 4 организаций шотышто административный производствым тӱҥалыныт.
— Эпидемий кузе вияҥаш тӱҥалеш, кызытеш иксемын вашешташ огеш лий. Но икте раш: самодисциплине вирусын икте деч весылан куснымыжым кӱрлаш полшышаш, — каласен Александр Евстифеев.
Регион вуйлатыше республикысе министерстве, ола ден район-влак вуйлатыше-шамычлан еҥ-влак коклаште умылтарыме пашам утларак чолган эртараш кӱштен.
Республикысе МВД-н пресс-службыжын палдарымыж почеш, Россий Федерацийын Админстративный правонарушений кодексшын «Нарушение законодательства в области обеспечения санитарно-эпидемиологического благополучия населения» 6.3 статьяжын 2-шо ужашыж дене келшышын, организаций-влаклан 200 гыч 500 тӱжем теҥге марте штрафым тӱлыктен але нунын пашаштым 90 сутка марте жаплан чарен шогалтен кертыт.
Тиде ончыкыжым тыгай сынан вес кевыт, организаций, заведений вуйлатыше-влакым шоналташ таратышаш, очыни, вет тазалык – эн шерге.
Любовь КАМАЛЕТДИНОВА
