Марий Элын Тазалыкым аралыме министерствыжын палдарымыж гыч, 15 апрельыште Йошкар-Оласе больницын инфекционный отделенийже гыч у коронавирус инфекций деч паремше ныл пациентым луктыныт. Лишыл жапыште эше 19 пациентым мӧҥгӧ колташ ямдылат.
Республикын стационарлаштыже коронавирус дене черланымым пеҥгыдемдыме диагнозан да инфекций дене авалталтын кертыныт манын шонымо 160 пациент эмлалтеш.
16 апрель эрдене Йошкар-Оласе больницын инфекционный отделенийыштыже 127 еҥ эмлалтын. Нунын кокла гыч 117 пациентлан «больнице деч ӧрдыжсӧ пневмоний» диагнозым шындыме, 22 еҥлан – коронавирус инфекцийым. 36 пациент неле состоянийыште, 90 еҥын тазалыкшым «нелылыкын кокла йыжыҥже» семын аклат, иктыным – «нелылыкын куштылго йыжыҥже» семын. Кок черле шодым искусственно вентилироватлыме йӧн дене шӱла, 54 пациентлан кислород кӱлеш.
Йоча республиканский клинический больницыште шым икшыве кия. Ныл пациент шкенжым сайын шижеш, кум йочан состоянийже «нелылыкын кокла йыжыҥже» семын аклалтеш.
Звенигово районысо рӱдӧ больницыште ик еҥ кия, тудо шкенжым сайын шижеш.
Козьмодемьянск межрайонный больницын инфекционный отделенийыштыже коронавирус дене авалталтын кертыныт манын шонымо шым пациент кия, черле-влакын состоянийышт «нелылыкын кокла йыжыҥже» семын аклалтеш.
Волжск оласе рӱдӧ больницын инфекционный отделенийышкыже коронавирус дене черланен кертше ныл пациентым пыштыме. Нунын состоянийышт «нелылыкын кокла йыжыҥыштыже». Кок черле кислород полшымо дене шӱла.
Марий Турек районысо рӱдӧ больницын инфекционный отделенийыштыже вич пациент кия. Кок пациент неле состоянийыште, кум черлын тазалыкшым «нелылыкын кокла йыжыҥже» семын аклат.
Медведево районысо рӱдӧ больницын коронавирусан пациент-влаклан хирургический да акушерско-гинекологический профилян медицине полышым пуымо отделенийыштыже индеш пациент эмлалтеш. Ик еҥлан кислород кӱлеш.
М.ИВАНОВА
