45 ийым темыме шот дене паспортем вашталтышым да ӧрын колтышым: у документ почеш ны пелашан, ны йочан омыл! Ынде кеч угыч ӱдырым нал!.. Тиде мо тыгай, а? Паспорт – личностьым пеҥгыдемдыше документ гын, тугеже тушто тудын нерген тичмаш увер лийшаш огыл мо?
А.Дмитриев
Параньга район
Йодышлан Марий Эл Республикысе Элкӧргӧ паша министерствын Миграций йодыш шотышто виктемыштыже тыге вашештеныт:
– Россий правительствын тений 15 июльышто лукмо пунчалже дене келшышын, РФ гражданинын икымше але вашталтыме, угыч пуымо паспортышкыжо мужыран, ойырлышо да йочан улмыж нерген отметкым огыт шынде, тиде радам гыч вӱрын группыжымат кораҥдыме. Но айдеме документыштыже чыла тидым ончыктынеже гын, кумылжылан нигӧат чаракым ок ыште.
Паспортысо штамп – мужыраҥмым пеҥгыдемдыше документ огыл. Айдемын мужыран, ешан але шкет улмыжым нине документ гына пеҥгыдемдат – мужыраҥме нерген таныккагаз, шочмо нерген таныккагаз да мужыраҥмым шӧрымӧ нерген таныккагаз.
Российыште 2018 ий гыч гражданский состояний акт-влакын единый кугыжаныш реестрышт пашам ышта. Тушко элыштына мужыраҥме нерген чыла увер пурталтеш. Тылеч посна загсын 1926 ий гыч тӱҥалын тачысе кече марте погымо чыла увержым цифровой носительыш кусарыме. Сандене, кызытсе пелаш дене ойырлыде, весым нигузеат марлан налын огыда керт.
2022 ий 1 июль гыч у паспортым налме радам улыжат вич кечым налеш. 20 да 45 ийым темыше-влаклан паспортым вашталтыме жапым кум тылзе марте шуйымо. Гражданинын йодмыж почеш, ончычсо паспортысо чыла уверым у документышкат пурташ лиеш.
Паспорт-влакын цифровой трансформацийышт умбакыже шуйна. Воинский обязанность да илыме верыште регистраций нерген штамп-шамычым электрон видыш кусарат. Пытартышыжым шушаш ий кыдалнат илышыш пурташ палемдат.
М.ИВАНОВА
