КУЛЬТУР ДА ИСКУССТВО

Шӱшпык йӱкан мурызо Майя Романова

Ила гын, 23 мартыште тудлан 90 ий темеш ыле. Но шӱмжӧ ныл ий ончыч кырымым чарнен. Тиде  еҥже —  Марий АССР-ын да РСФСР-ын сулло артистше, марий калыкын  шӱшпык йӱкан мурызыжо Майя Романова. Тиде кечын, эртыше изарнян,  тудын илыме пӧрт воктене  калык шуко погынен ыле. М.Шкетан лӱмеш театрын актержо-влак коклаште  тӱрлӧ учрежденийлаште пашам ыштыше, сулен налме канышыш лекше ийготан еҥ-влак  лийыныт. Нуным иктыш тиде  уста актрисым, мурызым, поро кумылан шыма  ӱдырамашым пагалыме да йӧратыме уша. А амалже — Майя Тимофеевналан  тудын илыме пӧрт пырдыжеш сакыме Шарнымаш оҥам почмо.  М.Шкетан лӱмеш театрын директоржо, Марий национальный конгресс вуйлатыше Михаил Матвеев марий артист-влаклан тыгай  оҥам почмо сай пашам умбакыже шуйымо нерген палемден да мутым театрын ик эн кугу опытан актержо Ю.В.Алексеевлан пуэн. Юрий Валерьевич Майя Тимофеевнан илыш корныж гыч посна йыжыҥ-влакым палемден коден.  А теве Марий театрыште кужу жап тӱҥ режиссерлан пашам ыштыше Сергей Иванович Иванов ойлымаштыже Майя Романован артист семын спектакльысе кокымшо планым ончыко луктын моштымо мастарлыкшым поснак палемден кодыш. А вара  Марий Элын культур, печать да калык-влакын пашашт шотышто министр М.З.Васютин дене коктын Шарнымаш оҥа ӱмбач пӱрдышым нальыч. Шарналтен ойлыш  семмастар Клим Степанов шке жапыштыже телевиденийлан  мурым возымо, пырля сценыште модмо  нерген Венера  Савина. У Торъял районын Йошкар-Оласе  землячествыже да тудым вуйлатыше Виктор Наумов гын Шарнымаш оҥам  оҥам ямдылымашке шке надырыштым пыштеныт.

А рушарнян  театрыште  кугу концерт лийын. Тудо  Майя Романовам да ты  сценыште модшо ветеран-влакым шарнымашлан  пӧлеклалтын ыле.  Ты программе тӱҥалме деч ончыч  Марий национальный конгрессын латвич ияш лӱмгечыж  дене Оньыжа Эдуард Александров  саламлыш, тудын икымше вуйлатышыже С.И.Ивановлан  Тауштымашым кучыктыш.

Концертын икымше отделенийыштыже  марий сценын метрже-влак  (эн мастар мурызыжо)  калык ончыко лектыч. Марий Элын калык артистше-влак Геннадий Петуховын, Зоя Берникован, Вячеслав Созоновын,  Марий Элын сулло артистше Олег Логиновын мурымыштым ончаш толшо-влак моткоч шокшын вашлийыч.   Программым  М.Шкетан лӱмеш театрын  артистше-влак:  Российын сулло да Марий Элын калык артистше Иван Смирнов,  Марий Элын калык артистше Светлана Строганова,  труппыш кодшо ийын ушнышо самырык  актер-влак Наталья Алексеева, Марина Воронцова, Алексей Юнусов, Иван Соловьев — сӧрастарышт.  Нуно шке коклаштышт оҥай дуэт-влакым ыштеныт.

Ик эн шергыже, мутат уке, Майя Романован репертуарже гыч  «Эҥер вӱд ӱмбалне» (Зоя Берникова), «Тый уке улат да» (Светлана Строганова)  муро ыльыч.  Жалке,  телевиденийын сниматлыме материал экраныш йӱк деч посна лекте. Майя Тимофеевнан муралтымыжым веле огыл, кутыралтен колтымыжым  колышташ эшеат куанле ыле.

Майя  Романовам эртыше арня мучаште шочмо У Торъял кундемыштыжат шарналтеныт. Тушто (да театрыштат)  мурызылан пӧлеклалтше  фотовыставкым чумыреныт, верысе калык деке театрын  актержо-влакат ушненыт.

Иктым каласен кодыде огешак лий. Майя Романова  кугу сценыш 83 ийыш тошкалше мураш лектын. Тиде  мемнан «Марий Эл» газет редакцийын ямдылыме концерт годым Йошкар-Олаште да Морко поселкышто лийын.  Шарнем, Сеҥымашын ХХХ идалыкше лӱмеш культур полатыш шыҥ-шыҥ погынышо калык тунам,  Майя Тимофеевнам  ужмыжлан йывыртен, шогалын, 6-7 минут совым кырыш.   Тиде  артист, мурызо  чынжымак курым-курымеш марий чонышто илаш тӱҥалеш. Тыгай мастар  курымлан икте шочеш, маныт.

Светлана БЕЛКОВА.

 

«Адакат мурет шыман йоҥгалте,

Адакат йӱкет шӱмем туржеш.

Кумылемже лие,ой, йомартле –

Я мураш, я чоҥешташ ӱжеш»

                                      (Зинаида Ермакова).

Опубликовать в Одноклассники