Каласыза, пожалуйста, олам кӱшычын ончымо кабинан пӧрдшӧ ораваш билет кызыт мыняр теҥгем шога? Шуко шочшан ешлан иктаж-могай скидке уло мо?
Э.Товкачёва
Йодышлан Йошкар-Олаште культур да каныме рӱдӧ парк директорын пашажым жаплан шуктышо А.А.Иванов вашештен.
– Билетын акше: йочалан – 60, кугыеҥлан – 100 теҥге. Каныш кечылаште «Ӧрыктарыше орава!» акций эрта. Акций жапыште, шуматкечын 10 гыч 14, а рушарнян 10 гыч 15 шагат марте 1 билет дене 2 йырым пӧрдаш лиеш. 7 ияш марте йоча-влак (ача-ава дене пырля!) оксам тӱлыде пӧрдын кертыт. Кеҥеж пагытыште кум да тылечат шуко шочшан ешлан скидке лийын, но кызыт тыгай йӧн уке.
Р.ЧЕПАКОВА
