РУБРИКИ

Шошо призыв-2018: Икмыняр вашталтышат уло

Элна мучко шошо призыв тӱҥалын. Тудо 2 апрель гыч 15 июль марте шуйна. Тиде пагытыште республикыште 700 (18 гыч 27 ияш марте) наре еҥ салтак радамыш шогалшаш. 

Марий Элын сборный пунктшо гыч икымше тӱшка рвезе-шамычым 25 апрельыште колтат. Тӱҥ налмаште шукышт сухопутный войскашке логалыт. Дипломан рекрут тыглай салтак семын латкок тылзылан стройыш шогалаш але кок ийлан контрактник лияш – шке ойырен налеш.

– Призыв молгунамсе семынак эрта. Тыгодым икмыняр вашталтышым пуртымо. Мутлан, ончыч армийлан йӧрдымӧ але иктаж черлан кӧра салтак радамыш логалдыме рвезе-влак, уэш медосмотрым эртен, шке кумылын салтак радамыш каен кертыт. Тачысе кечылан лу йодмаш пурен, – мане журналист-влак дене пресс-конференцийым эртарымыж годым республикын военный комиссарже С.Сидоркин. – Военный службым эрташ ямдылалтше-шамыч профотборым, поснак психологически келгын тергымашым эртат. Вузын талантан выпускникше шке кумылын научный ротыш служитлаш возалт кертеш. Спорт ротыш шонышо чыла кумылан еҥак ок логал. Тушко элнан сборный командыштыже улшо але кандидат-влакым ойырат.

Тыгак Сергей Михайловичын ойлымыж почеш, кӱшыл заведенийым тунемын лекше-влакын специальностьыштымат шотыш налыт. Адакшым армийыш кайышаш рвезе-влак верч мутым муниципальный образований вуйлатыше-влак кучаш тӱҥалыт. Призывник-шамычлан посна персональный картым (тушто айдеме нерген ятыр увер лиеш) пуат. Тудыжо службо деч варат кӱлеш лиеш. Тылеч посна «Мир» банке картым кучыктат. Тушко салтаклан кажне тылзын оксам пыштат.

Палаш оҥай: 2003 ий гыч таче кече марте 63 еҥ альтернативный службым эрташ кӧнен. Палемдыме верыш колтымо деч ончыч рвезылан тыглай вургемым чиктат: ВМФ-ыш – шем тӱсаным, ВКС ден ВДВ-ыш – кандым, моло тӱрлӧ войскалашке – (шемалге-ужар) защитный тӱсаным. Юж десант войскаш каяш ямдылалтше-влак моткоч келге тергымашым эртат.

Кажне призывниклан службым эртыме вер марте каяш кочкыш-паёкым пуат. Тыгак несессорым (19 предмет) кучыктат.

– Контракт почеш кайышат ятырын улыт. Мутлан, 2016 ийыште 700 наре, 2017 ийыште 600 наре еҥ контракт почеш службыш каен. Нуно йодмашым призыв тӱҥалме деч ончыч возышаш улыт. Таче кечылан ты тургымышто вузлаште тунемше-влак кокла гыч 40 еҥ, сузлаште тунемше-шамыч кокла гыч 50 еҥ контракт почеш службым эрташ йодмашым пуэн. Тыгак кажне ийын 300 наре еҥ военный вузлашке тунемаш пураш йодмашым возен. Тышеч 35 процентше тунемаш пурен кертын. Тидыже – мемнан кундемлан сай результат, – мане контракт почеш службыш погымо шотышто начальник В.Фоминых.

Е.Эшкинина

Опубликовать в Одноклассники

Добавить комментарий