СПОРТ

Шонымаш – Олимпиадыш логалаш

Июль тӱҥалтыште Волжск гыч Артём Коровин байдарке да каноэ дене (гребля) Европын первенствыштыже Российын командыж дене 500 метр кужытышто ший призёр лийын.

Таҥасымаш Италийыште юниор да 23 ияш марте самырык-влак коклаште эртен. Волжск гыч тренер-влак Мещераковмытын воспитанникышт Артём элнан сборныйыштыжо Данил Ветров, Дмитрий Иваник, Дмитрий Моргунов дене пырля таҥасен, да нуно байдарке дене таҥасымаште ший медальым сеҥен налыныт. Такшым тунам «шийжым» немыч-влак дене пайлашышт логалын. Оҥай, но могай команде виянрак улмым фотофинишат рашемден кертын огыл. Икымше верыш Белоруссий гыч мийыше-влак лектыныт.

А.Коровин тыгак байдарке дене шкет таҥасымаште 1000 метр кужытышто кудымшо верым налын. Тренержын палемдымыж почеш, рвезе ончыкылыклан ӱшаным пуа, сайын выступатла. «Можыч, 2020 ийыште эртышаш Олимпийский модмашкат кандидат семын лиеш», – манеш тудо. Тренерже-влак, кочаже, аважын кок шольыжо, ямдылат.  

Тений рвезе «Кугешнена!» рубрике денат газетеш савыкталтын. Артём 16 ияшак спорт мастер нормативым шуктен. Тудо тӱрлӧ кӱкшытан таҥасымашлаште вийжым терга, моткоч сай результатым ончыкта. Шонымашыже: «Олимпиадыште вийым тергаш». Тек спортсменын шонымашыже шукталтеш, Марий Элеш гыч лекше рвезын лӱмжӧ тӱня мучко йоҥгалтеш.

Е.ЭШКИНИНА

Опубликовать в Одноклассники

Добавить комментарий