31 октябрьыште Марий Элым вуйлатыше Александр Евстифеев шахмат дене тӱнян вице-чемпионжо, тӱнямбал гроссмейстер Сергей Карякинын шахмат школжым почмашке миен.
Тиде проект кӱчык жапыште шукталтын: А.Евстифеев ден С.Карякин тений июльышто вашлиймышт годым Шахмат школым почаш кутырен келшеныт. Тиде пунчал Марий Эл Республик правительствын полшымыж да ФИДЕ Тӱнямбал кубокын озажын, Россий Спортын сулло мастержын участвоватлымыж дене тичмашнек шукталтын.
«Сергей Александрович мемнан деке брендше дене веле огыл, тыгак регионын ончыкылыкшо – самырык тукым – дене интеллектуальный сеҥымашыже, методикыже, шинчымашыж дене пайлалташ толын. Тидыжак шергакан. Шахмат школышто тыгай вуйлатыше деч уло молан тунемаш», –манын Марий Элым вуйлатыше.
Погынышо-шамычым у школым почмо дене саламлымыж годым А.Евстифеев Россий Президент В.Путинын ойжымат цитироватлен: «Шахмат – спорт гына огыл, тудо айдемым мунлыракым да торашке ончен моштышыракым ышта, ситуацийым чын аклаш да поступкым икмыняр ходлан ончыко шотлен лукташ полша. А тӱҥжӧ – характерым воспитатла».
С.Карякин регионым вуйлатышылан школым почаш полшымыжлан уло кумылын тауштен да сай ончыкылыклан ӱшанымыжым ойлен. «Шахмат школ тиде модышым йӧратыше чыла еҥым вуча. Толза тушко, вет тыште модаш тунемаш чыла йӧн уло», – манын тудо.
Кугу уна-влак тений ноябрьыште Шахмат дене тӱнямбал первенствыште Российын сборныйыштыжо Марий Элын чапшым аралыше Максим Волковлан сеҥымашым тыланеныт.
Шахмат школым почмо дене саламлыме, тушто тунемше-влаклан кугу сеҥымашке шуаш тыланыме мутым Марий кугыжаныш университетын ректоржо М.Швецов ойлен, а Тӱнямбал шахмат федерацийын президентше А.Дворкович ден Россий шахмат федерацийын президентше А.Филатов тидым телеграмме гоч ыштеныт.
Торжественный церемоний деч вара уна-влак занятийым гроссмейстер дене онлайн режимыште эртараш лийме кызытсе жаплан келшыше мультимедийный оборудований дене шыҥдарыме школым ончен савырненыт. Тыште С.Карякинын авторский йӧнжӧ дене профессиональный тренер-влак туныкташ тӱҥалыт, нунын коклаште – шахмат дене ФИДЕ спорт мастер, Марий Эл Республикын кок пачаш вице-чемпионжо, кок пачаш чемпионжо, Йошкар-Олан кок пачаш чемпионжо А.Степулёв.
«Школышко шкежат идалыкыште эн шагалже кок гана толын савырнем. Тыгак онлайн-урокым, видеоконференцийым эртараш тӱҥалам, 20 июльышто, Шахматын кечыжлан, Регион-влак кокласе «Бендериада» сатир да юмор фестивальыште обязательно участвоватлем», – палемден С.Карякин.
А.Евстифеевын палемдымыж почеш, республикыштына тӱшка спортым вияҥдымылан кугу тӱткыш ойыралтеш.
Шахмат школышто тыгак «Школышто – шахмат» программе дене тӱҥалтыш класслаште туныктышо-влакын да «Шахмат дене кружок пашам ворандарымаш» программе дене ешартыш шинчымашым пуышо педагог-шамычын квалификацийыштым нӧлташ палемдыме.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен.
