«Мишкан — финн-угор тӱнян тӱвыра рӱдыверже» программын кышкарыштыже 27 мартыште Мишканыште «Йылме, йӱла, тӱвыра — марий калык поянлыкын негызше» («Язык, традиции, культура — основа богатства марийского народа») регион-влак кокласе шанче-практике конференций лиеш.
Тудым Башкортостанысе Калык-влак келшымаш пӧрт «Ош кече» материальный огыл тӱвыра поянлыкым аралыше да вияҥдыше фонд да Башкортостанысе Марий юмыйӱла рӱдӧ организаций дене пырля Мишкан район администрацийын полшымыж дене эртара.
Конференцийын тӱҥ шонымашыже — шочмо йылмым, литературым, тӱвырам, юмыйулам арален да вияҥден шогаш, ты пашаште лекше тургыжландарыше да пӱсын шогышо йодыш-влакым каҥашаш.
Конференцийыш мер пашаеҥ ден активист, марий йылмым туныктышо, образований пӧлкан методистше, марий онаеҥ, ученый, тӱвыра, лудмывер, тоштер пашаеҥ, журналист, творческий коллектив-влак, кучем органлан представительышт ушнышаш улыт.
Мутланымаш ныл секцийыште мутланымаш каяш тӱҥалеш: «Марий юмыйӱла», «Марий йылме», «Эрвелмарий-влакын мер илышышт», «Марий тӱвыра да йӱла». Конференцийыште Россий Федерацийыште тӱрлӧ вере илыше марий-влак ушнен кертыт. Кумылан-влак ончылгоч лӱмым ончыктыман йодмашым докладын текстше дене пырля тыгай адрес дене колтен кертыт:oshkeche@mail.ru. Выступленийлан 5 минут ойыралтеш. Конференцийын паша лектышыж почеш доклад-влакым посна сборник семын савыктен луктыт. Йодмашым 15 март марте колтыман.
Конференций Мишкан рӱдӧ лудмыверын актовый залыштыже 27 мартыште 10 шагатлан тӱҥалеш.
С.НОСОВА
