4 апрельыште Юл кундем кугыжаныш технологий университетыште тунемше-влак коклаште кумлымшо гана республикысе научно-технический проект-влак конкурсышт эртен.
Тушко Йошкар-Оласе 23 — шо №ан ден Силикатный посёлкысо школ-влак, Бауманский лицей, Йоча да самырык-влаклан техник усталык рӱдер чылажге 26 участник ушненыт. Конкурс «Промышленный технологий ден робототехнике», «Декоративно-прикладной творчестве, моделирований да прототипирований», «Умный мир:IOT» «Социал инноваций ден образований» – номинацийла дене эртен. Тений коронавируслан да моло амаллан кӧра шагалракын толын кертыныт. Йоча-влакын шке проектым аралымыштым эскераш оҥай ыле. Нуным шанче жюри аклен. Темлыме проект дене чыла могырымат палдараш кўлын: тудын акше могай, моло тыгай устройство деч мо дене ойртемалтеш, могай материалым да деталь-влакым кучылтыныт, программе почеш пашам ыштат. Ты конкурсышто рвезе-шамыч дене ӱдыр-влак иктӧр шогат. Нунат тӱрлӧ станок денат пашам ыштен моштат. Конкурсыш йоча-влакым Сергей Войтенко (23 №-ан школын технологий предметым туныктышыжо) ден Владимир Изиков (ешартыш образований туныктышо) ушеныт. Тунемше-влак дене пырля ава-ача-влак толыныт. Южо конкурсант дене палыме лийым. Егор Софронов «Ультразвуковой дальномерын» макетшым конден. Дальномерже нерген изи докладым ыштыш. Мария Лежнинан макетше дене тунемше-влакын температурыштым дистанционно тергаш лиеш. Кирил Кузнецов мардежын, кечын, вӱдын вийышт йон дене пӧртыш электричествым пурташ кучылтмым ончыктен. Пеш келшыш Никита Жировын докладше. Тудо погынышо-влакым «SIM 900» лўман GPS-модем нерген палдарен. Модем АТ-команде дене виктаралтеш, SMS-ым колта, йыҥгырта да сото кылым куча. Тыге проектышт дене тунемше-влакын шанче тӱняшке икымше ошкылышт лиеш. Умбакыже нине талантан йоча-влак ончыкылык шымлызе лийын кертыт манын ӱшан уло. 
М.СКОБЕЛЕВ
Авторын фотожо
Снимкыште: 031 — Егор Софронов (ЦДЮТТ) «Ультразвуковой дальномер» макетше дене палдара.137 — А.Хуснуллина шке макетшым сото кыл йӧн дене уша. 103 снимкыште — К. Кузнецов (23 №-ан школ гыч) пӧртыштє. 052 Н.Жировын (ЦДЮТТ) «SIM 900» GPS-модем да сото кыл ушымо устройство.
