САМЫРЫК ТУКЫМ

Чылажат — чоҥышын кидыштыже

 

Кызыт самырык-влак юрист, экономист да ты пагытын йодмо вес профессиян лияш кумылан улыт. А уверым пуышо газетлам але социал лаштыклам ончалаш гын, утларакше сварщик, механик, инженер кӱлыт.

Теве самырык рвезе Василий Сурин Волжск олаш Коми Республик Сыктывкар ола гыч чоҥымо да оралте эксплуатацийын кугурак техник-технологшылан тунемаш толын. Кидыштыже але диплом уке. Туге гынат тудо чоҥышылан кызытак тырша.

– Вася, молан тиде профессийым ойырен налынат?

Вич ий ончыч Волжск олаш тунемаш шонен толынам. Тыште ковам ила, сандене ты республикым ойырен налынам.

Ончыч профессий шотышто тургыжланен омыл. Тунемам да йӧра. Но шуко уым пален налмек, шинчымашем нӧлтымӧ семын ты пашам йӧраташ тӱҥалынам. Кызыт умылем: чоҥышо неле да кӱлешан профессий.

Тудо оралтын негызше гыч тӱҥалын, леведышыж мартекузе ышталтмым чыла палышаш. Шуко-мом ачален, тӧрлен сеҥа. Тиде моштымаш рвезе еҥлан пешак кӱлешан.

    Тыгак профессийын калыклан пайдам конда. Тидыже мылам келша. Кушто ме илена, пашам ыштена, могай оралтым йыр ужына – чыла чоҥышын кидыштыже. Цивилизацийышкат ошкыл лач чоҥымаш гыч тӱҥалын.

А мо тылат ок келше?

Тыште лач иктым палемдынем – ты профессийым еҥ-влак ала-молан огыт акле. Шукын чоҥен моштат гынат, кажныжым строитель манаш ок лий.

– Тиде лӱмым нумалше еҥ могай лийшаш??

– Чоҥышо объект нерген чыла уверым ушыштыжо кучышаш. Вучыдымо ситуаций гыч лектын моштышаш. Тыгак сай вуйлатыше лийшаш. Пашам шот дене ыштышаш. Мутлан, прораб нӧлтымӧ оралтыжлан витле ий наре мутым куча…

– Чоҥышо лияш шонышо-влаклан мом каласен кертат?

Тиде пашаш ушнынеда гын, нелылыклан ямде лийман. Садлан сайжым-осалжым ончылгоч вискалыман.

– Вася, тый тыгак повар да массажист курслам эртенат…

Массаж ешартыш оксам ыштен налаш полша. Еҥ-влак кап-кылым лывырташ, тазалыкым пеҥгыдемдаш шонымаш дене толыт. Вет тазалык деч шерге нимат уке. А кочкаш кажныже шолтен моштышаш.

Илышыште тӱрлӧ лийын кертеш, садлан ешартыш специальность нигунам уто огыл.

– Ме тый денет кодшо ийын эртыше Марий самырык тукым слётышто палыме лийынна. Тушто шкендым ик эн чолга участник семын ончыктенат. Мо дене тора кундем гыч толшо рвезым марий тӱвыра сымыстарен?

Район, республик кӱкшытыштҥ эртаралтше мероприятийлашке чӱчкыдын ушнем. Слёт нерген пален налмеке, каемак манын шонен пыштенам. Пырля йолташемым, Алексей Ерёминым, таратенам. Мыланна калык тувырым муаш неле ыле: ӱдыр-влаклан костюм шуко, а рвезылан уке.

Мыланем марий йылме моткоч келша – муро йоҥгымыла чучеш. Слётышто южо лекцийжым умылен омыл гынат, уло кумылын колышт шинченам. Кум кече жапыште икмыняр мутымат тунем шуынам. Шотлен моштем.

Тыгак Марий Элыште еҥ-влакын ласка да поро чонышт кумылем налын.

– Ончыкылык корнет волгыдо лийже.

– Тау.

О.МОШКИНА

 

Опубликовать в Одноклассники

Добавить комментарий