«Кумыл – тиде шуко йӧн,
Кумыл уке гын шуко амал уло…».
Тыге возен шке почеламут корнылаштыже руш поэт Эдуард Асадов. Тудын мутшо пеш чын. Иктажым ыштет гын веле шонымашет шукталт кертеш.
Тачысе лаштыкын унажын чонжо усталык саскажым сборникыш чумырымо верч йӱлен. Тидым савыктыш гоч шуктен кертын огыл гынат, кидыштыже ныл книгаже уло. Кузе? Тиде да моло йодышемлан вашмутым Виче кундем Малмыж район Перескоки ял гыч мотор марий ӱдыр Алина Яковлева пуыш. Ӱдыр фамилийже – Никифорова. Садлан Алина Ник псевдонимым налын.
– Алина, сылнымут корнет тӱҥалтышым кушеч налеш?
– 16 ияш почеламутым возен онченам. Икте почеш весе «шочын». Тудо рифме могырымат, шонымаш могырымат саемын толын. Тыге тиде сомылым умбакыжат шуяш кумылаҥынам.
Южгунамже урок годымат серенам. Ты годым туныктышым огыл, а музам колыштынам, очыни. Шагал огыл пашам конкурслашке колтенам. Ондаксе текстем-влак ала-куш йомыныт. Кызыт нуным шергал лекташ оҥай ыле…
– 2018 ийыште воткылыш (соцсетыш) «Чонышкем шошо толын» сборник лекме нерген уверым луктынат ыле. Тудым шке ыштенам манмет ӧрыктарыш. Вет чылт кевытысе гай коеш.
– Тиде сборникым ушештарыше паша манам гын, чынрак. Шуко почеламутем улмым пален, йолташем, тӱрлӧ чиян принтер дене пайдаланен, тудым книга семын келыштараш темлен. Кузе коймыжым кеч ончалат, манын. Шкежат тидын нерген шонен коштынам, лач кушеч тӱҥалаш пален омыл. Йолташемын ойжо шӱкалтышым ыштен.
Йоҥылышат каен, почеламут-влакшат изиш начаррак лийыныт, очыни. Туге гынат лекше материал мыйым моткоч куандарен. Икымше паша-влакем «Ныжылгылык», чулымрак шонымашан-шамычем «Серем» сборниклаш чумыренам. Эн чапле усталык саскам «Ойырен налме» книгаш пуреныт. Нуно рушла возалтыныт.
Тыге ныл пашажат мӧҥгыштӧ, принтер гоч «шочыныт». Шукыжым йолташем-влаклан пӧлек шотеш кучыктенам.
Издательство гочат моткоч лукнем. Теве вашке Москосо «Арт-Сияние» савыктышын «Modern poetry» 14-ше №-ан сборникше лектеш. Тушто вич лаштык – мыйын. Тичмаш книгам лукташ изи огыл шийвундо кӱлеш. Но тиде шонымашем шукталтеш манын, ӱшаным ом йомдаре.
– Почеламутым возаш вийым кушеч налат?
– Сергей Есенинын, Марина Цветаеван, Анна Ахматован, Владимир Маяковскийын творчествышт пример шотан улыт. Кызытсе поэт кокла гыч Ах Астахован мастарлыкшым эскерем. Нуным лудын, тыгаяк тале лияш кумыл лектеш.
А почеламут корно-влаклан темым илыш гыч налам. Куан, ойго, лӱдмаш, йӧратымаш – чылажат кагаз ден ручкам кидыш кучаш тарата. Лӱмын возымаш уке.
– Тый Марий кугыжаныш университетыште «Музеолог» специальностьым налынат. Пашат профессиет денак кылдалтын?
– Тыге. Бакалавриатым МарГУ-што тунем пытаренам гын, магистратурылан Юлтехыхым ойырен налынам. Кокымшо верыштыже тунемме годым пашам кычалынам. Тунамак Йошкар-Олан историй тоштерже вакансий улмо нерген уверым луктын ыле. Ончыч, нылымше курсышто тунеммем годым, тушто практикым эртенам, садлан тушко каенам.
Пашам фондысо отделыште шуктенам. Экспонат-влак ару лийышт, кӱлеш температуран пӧлемыште шогышт манын тыршенам. Тыгак кажне арвержым шымленам, нунылан шанче паспортым ямдыленам. Ончерлан келшыше настам ойыренам. Паша мылам пеш келшен. Кызыт кужу жаплан отпускыш лектынам.
– Тоштерыште кажне арвержым кучен онченат тугеже. Толшо-влаклан нунын нерген шкеак каласкалыме шуын огыл мо?
– Экскурсийым эртараш икмыняр гана логалын. Но тидын деке шӱмем огеш шупш. Экспонат-влакым шымлаш утларак келша. Шкежат тыгай улам: шуко еҥ коклаште лияш ом йӧрате. Шыпыште, тымыкыште мылам ласкарак.
– Самырык лудшына-влаклан могай тыланымашым каласет?
– Йӧратыза пелашдам, ешдам, родыда-влакым, йолташда-шамычым, ыштыме пашадам. Вет лач тиде шижмаш тӱням саемда, поремда.
– Тау! Шонымашет шукталтше.
О.МОШКИНА мутланен
