Марий Элыште COVID-19 дене черланыме чот иземеш.
Тидын нерген регионым вуйлатыше Александр Евстифеевлан Роспотребнадзорын Марий Элысе виктемжым вуйлатыше Светлана Булатова оперштабын 22 июльышто эртыше заседанийыштыже увертарен.
«Пытартыш кок арняште у коронавирус инфекций дене черланыме чот суткаште 29 случай деч шуко лийын огыл. Черле-влак дене кылым кучышо-шамычынат чотышт иземын толеш. 22 июльлан налмаште медицине велым 988 еҥым эскерыме, тыгодымак тиде чот ик тылзе ончыч 1,5 тӱжем утла лийын», – рашемден С.Булатова.
Ведомствым вуйлатыше тыгак инфекцийым предприятийлашке кондымо чотын иземмыжым палемден. Лӱдыкшӧ зонышто ончычсо семынак медицине тӧнеж-шамыч улыт. Тылеч посна маске деч посна коштмыжлан кӧра калык тӱшка транспортышто инфицироватлалтын кертеш, палемден С.Булатова.
Республикым вуйлатыше А.Евстифеев маске режимым умбакыже шуяш да тудын шукталтмыжым эскерыме пашам вияҥдаш кӱлмым палемден.
С.Булатова тыгак тылеч ончыч общепит пункт-влакын кеҥеж террасыштын да стоматолгий услугым пуышо организаций-шамычын пашам ышташ тӱҥалмышт нерген ушештарен. Тымарте общепит пунктышто COVID-19 дене черланыме случайым регистрироватлыме огыл. Ведомство ужалыше точкылаште, общепит объектлаште да аптекылаште пашаеҥ-шамычын маске да резинке перчатке дене пайдаланымыштым, калыкын кассе воктене социальный дитсанцийым кучымыжым, оборудований ден ӱмбал лончым обработатлашлан дезсредстван улмыжым умбакыже терга.
Марий Элын организаций да аналитике виктемжын уверже негызеш М.ИВАНОВА ямдылен
