14 мартыште Курчак театрыште самырык-влакын «Ончыко да кӱшкӧ!» форумышт икымше гана эртен. Марий Элын чолга, уста ӱдыр-рвезыже-шамыч кече мучко, шокшым кергалтен, пашам ыштеныт.
Мероприятийым почмо деч ончыч Марий Эл вуйлатыше А.Евстифеев театрын холлыштыжо верланыше выставке дене палыме лийын. А вара сцене гыч чылаштым саламлен, форум кугу лектышым пуыжо манын тыланен да самырык тукымым кадровый резервышке чулымынрак ушнаш ӱжын.
Панельный дискуссийыште форумыш чумыргышо ӱдыр-рвезе-влак Марий Элын самырык-влакын политикышт, спорт да туризм министрже Л.Батюкова, республикын промышленность, экономике вияҥмаш да торговльо министрже Д.Пугачев, Йошкар-Олан мэрже Е.Маслов, Марий Элын Элкӧргӧ политике, верысе кучемын вияҥмыже да юстиций министерствыжын мер ушемла да верысе самоуправлений организацийла дене кылым ыштыме шотышто отделым вуйлатыше М.Авдеева, верысе калык инициативылан полышым пуышо самырык-влакын «Опора» мер организацийыштын вуйлатышыже С.Дождиков, «Цитрониум» ООО-м вуйлатыше П.Шалагин, «Штурманы времени» активист-влакын сводный дружиныштын еҥже О.Мелентьева дене вашмутланеныт. Кучемын еҥышт республикыште самырык-влак дене кылдалтше паша кузе каен шогымо, могай лектышыш шумо дене палдареныт. А организацийым вуйлатыше-шамыч предприятийыштын шочмышт нерген каласкаленыт. Залыште шинчыше-влак кажнылан йодышым пуэденыт.
Варажым чыланат Национальный президент школ-интернатыш вонченыт. Тушто куд темылан пӧлеклалтше площадке пашам ыштен: «Идей-проект-паша», «Мыйын республикем, мыйын жапем, мыйын командем», «Таза да спортлан шӱман самырык тукым – виян эл», «Туризм: вияҥме ошкыл-влак», «Поро пашам ыштымем шуэш», «Марий Эл – вияҥаш йӧным пуышо кундем». Кажне секцийыште шокшо да оҥай мутланымаш эртен. Санденак секцийым вуйлатыше-влак ятыр йодышым ончаш жап ситыдымым палемденыт. Тыгак кажне площадкыште пашам ыштыше-шамыч республикысе кучемлан ятыр темлымашым пуэныт. Нуным ойыштым шотыш налын, форум шке резолюцийжым пеҥгыдемден. Тудын дене келшышын, самырык тукымын вийжым, ончыко каяш, вияҥаш, уым пален налаш тыршымыжым политикыште, социал сферыште, у технологийым ыштымаште да тудым илышыш шыҥдарымаште, моло вереат пайдалын кучылташ палемдыме.
Форумым петырыме годым республикым вуйлатыше А.Евстифеев самырык тукымым пашам сайын ыштымылан тауштен да тыгай шотан форум йӱлашке пурен шуэш манын ойлен. Тыгак тудо «Ончыкылык тукым: Марий Элын чолга да уста самырык тукымжо» книга дене палдарен да икмыняр ӱдыр-рвезылан савыктышым кидышкыже кучыктен.
— Мыйын шонымаште, форум сайын да пайдалын эртен. Площадкыште ончымо теме-влакат кӱлешан лийыныт. Кундемнан самырык тукымжын ончыко каяш, вияҥаш кумылжо таче моткоч шижалте. Тиде куандара. А секцийлаште пуымо темлымашым Самырык-влакын политикышт, спорт да туризм министерствыш колтымо. Ӱшанем, лишыл жапыште тушто шкешотан «корно картым» ыштат. Тудым ме илышыш шыҥдараш тӱҥалына. Тиде форум самырык тукымлан икте-весе коклаште веле огыл, тыгак республикын кучемже дене сай кылым ышташ йӧным пуэн, — палемден А.Евстифеев.
Л.ШАБДАРОВА.
М.Скобелевын фотожо.
