Удмурт Республикын рӱдолаштыже Финн-угор калык-влакын «Воршуд» фестивальышт эртен.
Тений тудо калык куштымашлан пӧлеклалтын.
Фестивальыш Марий Элын чапшым аралаш Шернур районысо Кукнур кундем гыч калык лӱмым нумалше «Пеледыш» фольклор ансамбль миен.
— Удмурт кундемыште ме икымше гана лийынна. Мемнам моткоч сайын вашлийыныт, чыла верыш ужатен коштыктеныт. Пайремым почмашлан пӧлеклалтше концертыште Румыний, Самара, Коми да моло кундем гыч толшо коллектив-влак дене пырля ик сценыште лияш — кугу пиал. Тыште ме Шернур вел мурен куштымашым ончыктенна. А фестивальым петырыме годым Шернур вел сӱаным чӱчкышна, — палдара ансамбльым вуйлатыше Анатолий Конаков. — Калыклан марий куштымаш, поснак тывырдыкна пеш келшен.
Мероприятийын икымше кечынже фестивальыш ушнышо коллектив-шамычын вуйлатышыштлан «йыргешке ӱстел» эртен. Тушто финн-угор калык-влакын куштымаш культурышт нерген мутланеныт. Анатолий Филипповичат тушто тошто марий куштымашын ойыртемже, тудым арален кодымо нерген каласкален.
— «Келшымаш кӱвар» пайремат моткоч мотор верыште – Ижевскысе пӱя воктене — эртен. Тушто солык дене куштымаш да палыме лийме йӱла модышым ончыктенна, — ойла А.Конаков. — Фестивальын кокымшо кечынже ме Игринский районыш миенна. Концерт программе деч вара кундемым ончен савырненна. Тоштерыште лийынна, каныме паркыште пум пӱчкеден ыштыме тӱрлӧ арвер пеш оҥай улыт.
Тора кундемыш мийымеке, «Пеледыш» ансамбль удмурт Йӱштӧ кугызан (Тол Бабай) усадьбышкыжат пурен лектын. Марий артист-влак резиденцийын 7 гектар кумдыкшым ончал савырненыт, Тол Бабай дене вашлийын мутланеныт, тудын тронышкыжо шинчын онченыт.
— Тушто чылажыт йомакысе гай, — ойла Анатолий Филиппович.
Удмурт Республик гыч ты коллектив лауреатын дипломжо дене пӧртылын.
— Фестиваль поро шӱлыш дене эртен. Родо-тукым калык-влак дене вашлиймаш шуко жаплан шарнаш кодеш, — палемдышт «Пеледыш» ансамбльын участникше-влакат.
А.Байкова.
